Japonıanyń Hamamasý qalasy Ensýhama jaǵalaýynan tabylǵan metal shar sý betinde qalqyp turatyn býı ekeni anyqtaldy. Bul týraly The Telegraph basylymy jazdy.

Shardy rentgen sáýlesi arqyly teksergennen keıin zat jarylys qaýpin týdyrmaıdy degen qorytyndy jasalyp, polısıa jaǵalaý aýmaǵyndaǵy qorshaýdy alyp tastady. Osylaısha, belgisiz zat Qytaı nemese Soltústik Koreıanyń barlaýǵa arnalǵan apparaty bolýy múmkin degen kúdik rastalmady.

Hamamasý qalasy tehnıkalyq departamentiniń basshysy Narıýkı Takahashı shar tárizdes zat japon óndirýshilerine tıesili emestigin, ony qaladaǵy óndiris oryndarynyń birine jetkizgenin aıtty. Eger zattyń ıesi tabylmasa, ony qaıta óńdeýge jiberedi. 

Keshe Ensýhama jaǵalaýynan dıametri 1,5 metr bolatyn temir shar tárizdes zat tabylǵan. Belgisiz zat jýyrda AQSH aýmaǵynda ushý apparaty atyp túsirilgennen keıin kópshilik nazaryn aýdartqan. AQSH ushý apparaty Qytaıdyń barlaý nysany bolýy múmkin dese, Qytaı ony qarapaıym meteozond ekenin aıtady. Osy oqıǵadan keıin Japonıa qorǵanys mınıstrligi japon áýe keńistigine engen kúdikti áýe nysandarǵa qarsy qarý qoldaný erejelerin keńeıtetinin málim etken.