Jambyl oblysynda kóktemgi sý tasqyny kezeńinde sý basýy múmkin 42 eldimeken esepte tur. Bul týraly Jambyl oblysy ákiminiń orynbasary Nurlan Kalenderov málim etti.

"Oblys aýmaǵynda kóktemgi sý tasqyny kezeńinde ákimshilik aýmaqtardaǵy sý basýy múmkin 42 eldimeken esepte tur. Eldi mekenderdi sý tasqynynan qorǵaý maqsatynda, ár jyl saıyn sý tasqyny josparlarynyń oryndalý barysynda, sý basýy múmkin 42 eldimekenniń 34-nen qaýip alyndy, 2 eldimekenniń qaýipi tómendetildi, sý basýǵa beıim tek 6 eldi meken qaldy, bul eldi mekender "2021-2023 jyldarǵa arnalǵan  sý tasqyny qaýpiniń aldyn alý jáne joıý jónindegi sharalar kesheni" Jol kartasyna sáıkes is-sharalar iske asyrylý barysynda tómendetilýi josparlanýda" delingen Qamshynyń resmı saýalyna berilgen jaýapta.

Sondaı-aq hatta oblys aýmaǵynda 157 gıdrotehnıkalyq qurylys bar ekeni aıtalyd. Onyń ishinde respýblıkalyq menshikte – 41, komýnaldyq menshikte – 106, jeke menshikte – 10.

"Taýly aımaqtardaǵy eldi mekenderdi sý basý qaýpinen aldyn alý jáne joıý maqsatynda, aýdan búdjetinen qarajat bólinip, kólbeý aǵyndardy eldi mekennen burý kanaldaryna mehanıkalyq tazalaý jáne qajetti jaǵdaıda qurylysyn salý jumystary júrgizilýde. Taý bókterinde uzyndyǵy 1305 km bolatyn 40 sý burý kanaly tazartylý jumystary júrgizilýde. 2023 jylǵa arnalǵan sý tasqynyna qarsy is-sharalar josparyna sáıkes, oblys aýmaǵynda kanaldardy, drenaj kanaldardy, aryq jelilerin jáne sý ótkizý qurylǵylaryn (kópirler jáne t.b.) tazartý boıynsha jumystar júrgizilip, árdaıym qatań baqylaýda. Sonymen qatar, oblys aýmaǵyndaǵy eldi mekenderdi sý basý qaýpinen aldyn alý úshin 7,000 m3 qar shyǵaryldy" delingen jaýapta.