Reseı prezıdenti Vladımır Pýtın Reseı Federasıasy ydyraǵan jaǵdaıda orys halqy etnıkalyq top retinde joıylyp ketýi múmkin ekenin aıtty. Onyń aıtýynsha, Reseıdi ydyratý – Batystyń basty maqsattarynyń biri.

"Eger biz osy jolmen júrsek, Reseıdegi kóptegen halyqtardyń jáne eń aldymen orys halqynyń taǵdyry túbegeıli ózgerýi múmkin. "Orys halqy" sıaqty etnostyń bolashaqta saqtalýy da ekitalaı" dedi ol "Rossıa-1" telearnasyna bergen suhbatynda.

Reseı Federasıasy men Batys arasyndaǵy teketires týraly tilshiniń suraǵyna Pýtın AQSH burynnan beri burynǵy KSRO elderin taratýdy josparlarlaǵanyn aıtty.

"Sonda ǵana ydyraǵan Reseıdiń jekelegen bólikteri Batys qoǵamymen birigedi" degen ol Batys mundaı josparyn qaǵazǵa túsirip qoıǵan dep sanaıdy.

Ol óz sózinde Batys elderin soǵysqa aralasqany úshin aıyptady. Biraq soǵystyń bastalýyndaǵy Reseıdiń róli týraly eshteńe aıtpady.

Onyń málimdeýinshe, NATO elderi Reseı men Ýkraına arasyndaǵy soǵysqa qatysýshylar, sebebi olar Ýkraınany tegin qarý-jaraqpen qamtamasyz etip otyr.

"Bul jaı ǵana áskerı-tehnıkalyq yntymaqtastyq emes. Olar (NATO elderi) Ýkraınaǵa kómekteskeni úshin aqsha almaıdy! Demek bul janama sybaılastyq" dedi Pýtın.

Derekkóz: "Moskva. Kreml. Pýtın"