Eńbek naryǵyndaǵy genderlik jaǵdaıdy taldaý nátıjesinde qazaqstandyq áıelder erlerge qaraǵanda 20%-ǵa az jalaqy suraıdy, dep habarlaıdy HeadHunter.

Áıelder arasynda eń tanymal mamandyq – esepshi bolsa, erkekter arasynda – júrgizýshi. Ári áıelderdiń jumys berýshiden talap etetin jalaqysy erkekterge qaraǵanda 20% tómen. 

"Áıelder suraıtyn jalaqynyń ártúrli bolýyna kóptegen faktor áser etýi múmkin. Solardyń biri, erlerdiń túıindemeleri áıelderge qaraǵanda kóp. Mysaly aqparattyq tehnologıalar, top-menedjment, logıstıka, avtomobıl bıznesi sıaqty salalarda erlerdiń túıindemesi kóbirek", - dedi onlaın platforma sarapshylary.

Budan bólek saýalnama qorytyndysy boıynsha jumys berýshilerdiń 96%-y qyzmetker tańdaǵan kezde er nemese áıel dep bólgen. Olardyń mundaı qadamǵa barýyna laýazymdy qyzmetti er adam ǵana isteı alady degen stereotıp pen áıelderdiń kez kelgen ýaqytta dekrettik demalysqa shyǵyp ketedi degen oı sebep bolǵan. Sol sebepti jumys berýshiler er adammen jumys istegisi keledi. 

Al áıelder jumys berýshimen kezdesý kezinde otbasylyq jaǵdaıyna qatysty suraqtardyń jıi qoıylatynyna shaǵymdanǵan.