Jýrnalıserge jasalǵan shabýyl faktileri boıynsha 30-dan astam qylmystyq is qozǵalyp, 22 adam ustalǵan. İshki ister mınıstri Marat Ahmetjanov osylaı dedi, dep habarlaıdy Qamshy.kz aqparat agenttigi.

Onyń sózinshe, jeti adam qamaýǵa alynǵan. Al qalǵandaryna jasyn eskere otyryp, qoǵamnan oqshaýlanýǵa qatysty emes bultartpaý sharasy tańdaldy.

«Qazirgi ýaqytta sotqa deıingi tergeý júrip jatyr», – dedi Marat Ahmetjanov Úkimet otyrysynan keıin BAQ ókilderiniń saýalyna jaýap bere otyryp.

Sondaı-aq mınıstr, jábirlengen jýrnalıserge isti tergeý barysyna qatysýǵa ruqsat etilgenin habarlady.

«Barlyq derek boıynsha prosesýaldy tulǵalar – jábirlenýshiler bar. Olar tergeýge belsendi qatysyp jatyr. Kúdiktilermen betpe-bet júzdesý boldy. Áriptesterińiz bul proseske qyzyǵýshylyq tanytyp otyr. Olardyń prosesýaldy mártebesi bar, ári suraqtar qoıa alady, iske belsendi qatysa alady, belgili bir tergeý áreketterin júrgizý úshin ótinish jasaı alady», – dep qosty Marat Ahmetjanov.

Esterińizge sala keteıik, buǵan deıin İİM jáne UQK jedel tergeý toby BAQ ókilderine shabýyl uıymdastyrǵan kúdikti toptyń jolyn kesken bolatyn.
Shabýyldardy uıymdastyryp, bastamashy boldy kúdikpen Qazaqstan azamaty Arkadıı Klebanov (Manevıch) ustaldy. Sondaı-aq, Almatyda arandatýshylyq áreketterdiń tikeleı úılestirýshisi – shetel azamaty, bilikti haker O.Tokarev qolǵa tústi.

Qylmystyq top V.Boreıkoǵa, G.Bajkenovaǵa, G.Erǵalıevaǵa, S.Ibraevaǵa jáne buqaralyq aqparat quraldarynyń basqa da ókilderine qarsy 30-dan astam arandatýshylyq shabýyl jasaǵan. Atap aıtqanda, avtokólikti órtegen, jýrnalıserge, olardyń týystary men redaksıalarǵa qoqan-loqqy kórsetken, DDoss shabýyldar jasaǵan.