Ońtústik Koreıanyń kedendik baqylaý zańdaryn buzyp, ózge eldiń shekarasyn zańsyz kesip ótken ekinshi qazaqstandyq ustaldy. Ol Inchhon qalasynyń Sadanjı aýdanynda polısıaǵa óz erkimen berilgen, dep habarlady Syrtqy ister mınıstrligi.

"Shekarany zańsyz kesip ótkeni úshin izdeýde bolǵan ekinshi Qazaqstan azamaty koreı polısıasyna óz erkimen tapsyryldy. Qazaqstan Respýblıkasynyń Elshiligi bul máseleni erekshe baqylaýda ustap, otandastarymyzǵa zańgerlik keńes beredi" – dep habarlady syrtqy ister mınıstrliginiń baspasóz hatshysy Aıbek Smadıarov.

Ustalǵan azamat – Túrkistan qalasynyń 2005 jylǵy týmasy Nursultan Irısbaev. Koreıa úkimeti izdeýde bolǵan qazaqstandyqty tabýǵa kómek bergen adamǵa 30 mln von syıaqy, eger kómek bergen adam zańsyz mıgrant bolsa, Koreıanyń ózinde vıza jasap beretinin aıtqan bolatyn.

Sonymen qatar, polısıa qashqyn óz erkimen berilmese, basqa qazaqstandyq azamattar men zańsyz mıgranttarǵa qysym kórsetiletinin aıtqan. Odan bólek Koreıaǵa keletinderge elge kirý tártibi qatańdatylatynyn da eskertti.

Eske sala keteıik, 25 naýryz kúni eki Qazaqstan azamaty Koreıadaǵy Inchhon áýejaıyndaǵy bıiktigi 3,6 metrlik qorshaýdan asyp qashyp ketken bolatyn. Olardyń biri Tedjon qalasynan qamaý alynǵan edi.