VIII saılanǵan Májilis depýtattary palatanyń jalpy otyrysynda Qazaqstan halqyna adal qyzmet etýge ant berdi. Olardyń qatarynda Rınat Zaıytov pen Ermurat Bapı da bar.

Ant berý rásiminen keıin depýtattar Májilis kýlýarynda jýrnalıserdiń suraǵyna jaýap berdi.   

"Qazir men qarsy bolǵan bıliktiń jartysy joq. Biz tek qazirgi úkimetpen jumys isteýdi bastaımyz. Nátıjesi qandaı bolatyny belgisiz" – dep málimdedi Rınat Zaıytov.

Onyń aıtýynsha, parlament – emosıa kórsetetin jer emes.  

"Meniń aımaqtardy aralap, halyqpen kezdeskenimdi barlyǵy kórdi. Saılaýda "Amanat" tolyq jeńiske jetti dep aıta alamyn. Bul shyndyq. Barlyq jeti partıanyń arasynan "Amanat" jeńdi", – dedi aqyn.

Al oppozısıoner Ermurat Bapı bolsa Toqaevtyń qazirgi saıasatyn qoldaǵandyqtan saılaýǵa túskenin aıtty.

"Men opozısıa ókili retinde Májiliske birinshi ret keldim. 1998 jyldan beri munda opozısıa bolǵan joq. Halyq úshin shaıtanmen de jumys isteýge daıynmyn" – dedi ol.

Sonymen qatar depýtat retinde qamaýda otyrǵan saıası tutqyndardy bosatý máselesin kóteretinin aıtty.

Jýrnalısterdiń "saılaý ádil ótti dep oılaısyz ba?" degen suraǵyna "meniń osy jerde turǵanym – osy suraqtyń jaýaby. Otyz jylda qalyptasqan búrokratıany bir sátte joıyp tastaı almaımyz. Saılaýda Nazarbaev júıesiniń yqpaly bolǵanyn joqqa shyǵarmaımyn" – dep jaýap berdi Ermurat Bapı.