Mańǵystaý oblysy Jetibaı aýylynda munaı–gaz salasyna jumysqa alýdy talap etip, joldy jaýyp turǵan turǵyndarmen qurylys kompanıalarynyń basshylary kezdesip, jumysqa shaqyrdy, dep habarlaıdy informburo.kz

Qurylysshylar turǵyndarǵa ártúrli jumys oryndaryn usynǵan. Olardyń qatarynda mashınıst, elektrık, slesar, ýchaske brıgadıri, asfált tóseýshi, búldozer mashınısi, júrgizýshisi, júk tasýshy, kirpish qalaýshy, sylaqshy syndy mamandyqtar bar.

"Qajet mamandar arasynda eń tómengi jalaqy 223 000 teńge bolsa, eń joǵarǵysy 450 000 teńge", – delingen habarlamada.

"Aláns LTD"  JSHS dırektory Asqar Kerelbaev Mańǵystaýda qurylys maýsymy uzaq bolǵandyqtan, turaqty jumys oryndary usynylyp otyrǵanyn atap ótti. 

"Sizderge jumys keregin estip, kómektesýdi, turaqty jumys oryndaryn usynýdy sheshtik. Atalǵan jumysqa ornalasý arnaıy bilimdi qajet etpeıdi, ári biliktilik arttyrýǵa da kómektesemiz. Bizdiń kompanıalarda 15 kúndik vahtalyq ádispen jumys jasaı alasyzdar. Ókinishke oraı, munaı salasynda barlyǵyn birdeı jumyspen qamtý múmkin emes, sondyqtan basqa jumys oryndaryn usynamyz", – dedi Asqar Kerelbaev.

Alaıda jınalǵandar munaı salasyna jumysqa turǵyzýdy talap etip, shaqyrtýdan bas tartqan.

Eske sala keteıik, osyǵan deıin narazylyq bildirýshiler arasynda 14 adam ashtyq jarıalaǵan bolatyn.