Búgin Astananyń Saryarqa aýdandyq №2 sotynda Qaırat Boranbaev sońǵy sózin sóıledi, dep habarlaıdy informburo.kz

"Ókinishke oraı, prokýrorlardyń óz qateligin moıyndaýǵa batyly jetpedi. Biraq sottyń osy qatelikterdi túzetip, ádildik pen zań ústemdigin qalpyna keltirýge batyly jetedi dep úmittenem. Keshe prezıdent adam quqyǵy máselesin kóterip, ár adamnyń óz quqyǵyn qorǵaı alatynyn senimdi bolýy men sottyń ádildigine kúmándanbaýy mańyzdy ekenin aıtty"–  dedi Qaırat Boranbaev.

Sondaı–aq ol "AzıaGazCHýndja" jáne "Qazaq Gaz" arasyndaǵy mámileden memleketke shyǵyn kelgen bolsa, óteýge daıyn ekenin jetkizdi.

Eske sala keteıik, Qaırat Boranbaevqa qatysty sot otyrysy byltyr 30 jeltoqsanda bastalǵan edi.

28 naýryzda ótken sot otyrysynda prokýror Qaırat Boranbaevty 8 jylǵa bas bostandyǵynan aıyryp, múlkin tárkileýdi suraǵan bolatyn.