Aqmola oblysy Bestóbe aýylynda júzdegen shahter eki kúnnen beri narazylyq ótkizip jatyr, dep habarlaıdy Azattyq radıosy.

"Altynalmas" kompanıasy naýryz aıynan bastap 76 adamdy jumys joqtyǵyna baılanysty demalysqa jiberse, jazda 84 adam jumysynan aıyrylǵan. Shahterlar aýyldaǵy negizgi jumys berýshi kompanıanyń mundaı sheshimine narazy.

30 naýryzdan bastap narazylyqqa jıylǵan jumysshylar qatary eki ese kóbeıgen. Olar jumys ornyn saqtap, shahtadaǵy sýdy sorǵyzýdy, ken orny jańa ınvestorǵa ótkenge deıin ortasha jalaqy tóleýdi talap etip jatyr.

Bestóbe ken ornyndaǵy jumys 2021 jyly shildeden bastap toqtaǵan. Sonyń saldarynan 1200 adam jumyssyz qalyp, keıbiri ózge jumysqa ornalasqan.

Shahtalar sýǵa toltyrylyp jatyr. Kompanıa ókilderi sýdy shahtadan basqa esh jerge tóge almaıtynyn aıtady. Al jumysshylar "kompanıa muny ádeıi istep otyr, osylaısha jumysshylardy ashyq ádispen altyn  óndirýge kóndirgisi keledi" deıdi. Bos qalǵan jumysshylarǵa bastapqyda ortasha jalaqy tólengen, biraq qańtardan beri jalaqy mólsheri azaıyp ketken.