Almatyda ótken mıtıńide Rysbek Sársenbaıuly qorytyndylap, Halyqtyq parlamenttiń qararyn oqydy. 

"Biz búgin Bas prokýratýranyń zańsyz eskertpesine qaramastan mıtıńige jınaldyq. Endi búgin aıtylǵan usynystardy qoryta kele, arnaı qarar qabyldaımyz. Qarar aldyn ala daıyndalǵan joq. Negizi alańdy qorshap, mıtıń ótkizýdi toqtatyp tastaıdy dep oıladyq. Alaıda eshteńeden qoryqpastan mıtıńige kelgenderge alǵys aıtqym keledi", dedi Rysbek Sársenbaıuly. 

Sondaı-aq mıtıń sońynda Halyqtyq parlamenttiń qararyn oqydy:

• QR Parlament Májilisiniń saılaýy zańsyz dep tanylsyn
• Qazirgi Toqaevtyń basqaryp otyrǵan Parlamenti legıtımdi emes dep sanalsyn
• Qazirgi zańdy jolmen saılanbaǵan "Amanat" jáne basqa partıalardan quralǵan Smaıylovtyń Úkimeti – eshqandaı syn kórmeıtin áljýaz úkimet. Sol sebepti olarǵa senimsizdik bildirilsin.
• Táýelsizdik alańy qantógistiń emes beıbit mıtıńilerge arnalǵan alań bolsyn. Almaty qalalyq maslıhaty buǵan deıingi sheshimderine ózgertý engizilsin. 

"QR ishten de syrttan da qaýip tónip tur. Elimizdegi seperatızmniń qandaı da bir túrine qatań tyıym salynsyn. Separatısterdi qamaý kerek. Al separatısterge qarsy kúresip, ultshyldyqty nasıhattap júrgen saıası tutqyndar bosatylsyn", –  dedi ol. 

Rysbek Sársenbaıuly Halyqtyq parlamenttiń jıyndaryna qatysýshylardyń sany aldaǵy ýaqytta artatynyn senimdi. 

"Qorqatyn eshteńe joq. Buǵan deıin de jıyn ótkizdik. Alaıda qazir 2 ese kóppiz. Budan keıingi jıyndarda da kóbeıetin bolamyz. Biz buǵan senemiz. Bılikten qoryqpaımyz! Konstıtýsıa jasasyz! Ádildik jasasyn! Zańdylyq jasasyn!", dep mıtıńini qorytyndylady Rysbek Sársenbaıuly. 

Mıtıń sońynda qatysýshylar ánuran aıtyp, birge fotoǵa tústi. Sherý barysynda zańbuzýshylyqtar oryn alǵan joq.