Búgin depýtat Edil Jańbyrshın májiliste Mańǵystaýdaǵy máseleni kóterdi. Ol batys óńirlerdegi  munaı-gaz kásiporyndarynda qyzmet kórsetetin servıstik kompanıalar jumysshylarynyń ereýili jıilegenin aıtyp, aımaqtaǵy ózekti máselelerdi sheshýdi talap etti. 

"Keshegi saılaýaldy úgit-nasıhat kezinde birneshe servıstik kompanıalar «Samuryq-Qazyna» Ál-Aýqat Qorynyń» Erejeleriniń talaptarynyń eskirgenin jáne qazirgi jaǵdaıǵa sáıkes kelmeıtinin aıtyp, shaǵymdanǵan bolatyn. Alaıda jyl saıyn ótetin tenderlerdiń kesirinen kontrakt ala-almaı qalsa nemese baǵa dempıńisinen kontrakt somasy edáýir tómendese 90% jumysshylary jumyssyz qalaıyn dep otyr. Mundaı mysaldardy kóptep keltirýge bolady", dedi Edil Jańbyrshın.

Budan bólek depýtat buǵan deıin de Mańǵystaýdaǵy jumyssyzdyqqa qatysty másele kóterilgenin, alaıda jergilikti atqarýshy bılik tarapynan júıeli jumys jasalynbaǵanyn aıtty. 

"Mańǵystaýda jarylaıyn dep turǵan "jara" kóp. Olardy keshendi túrde «emdeýmen» aınalyspasa, daý-damaı ári qaraı jalǵasyp, ýshyǵa beredi. Úkimet komısıasyn qurý jóninde Sizge hat ta joldadyq. Oǵan áli jaýap bermedińiz. Qashanǵy kózdi jumyp, qulaqty bitep, aýyzdy býyp otyra beresizder?! Máseleni sheshetin ýaqyt ótip bara jatyr. Erteń, "qolymyzdy mezgilinen kesh sermedik"  dep júrmeńizder", dedi depýtat. 

Sondaı-aq Edil Jańbyrshın tenderlerdiń ádiletsiz ótýi, jemqorlyq, tarıfterdiń tómendigi, baǵa dempıńisi sekildi máseleler jumyssyzdyqty joıýǵa kedergi keltirip otyrǵanyn aıtyp ótti. 

Sóz sońynda depýtat Konstıtýsıaǵa sáıkes elimizdiń baılyǵy halyqqa tıesili, ıaǵnı qazba baılyq turǵyndardyń ál-aýqatyn arttyrýǵa qyzmet etýi kerek ekenin aıtty.

"Sondyqtan «Samuryq-Qazyna» Ál-Aýqat Qory» jáne onyń portfeldik kompanıalary jańasha, ashyq, ádil jumys jasap, halyqtyń turmys-tirshiligin jaqsartýǵa naqty qadamdar jasasyn",- dedi depýtat.