Soltústik Qazaqstan oblysynda separatıstik áreket jasaǵany úshin 18 adam jaýapqa tartylyp jatyr. Bul týraly Májilis otyrysynda bas prokýrordyń orynbasary Jandos Ómiralıev habarlady.

"Ulttyq qaýipsizdik komıtetiniń SQO daǵy departamenti Qylmystyq kodekstiń 180 baby, 2 bóligine sáıkes "BAQ arqyly separatızmdi nasıhattaý" boıynsha qylmystyq is qozǵady. Aıyptalýshylardyń turǵylyqty jeri men jumys oryndarynda tintý júrgizildi. Dálel zattar alyndy. Atap aıtqanda, fleshka jáne taǵy basqa zattar. Osy zattar jáne top músheleriniń aıtqan sózderi boıynsha tıisti saraptama taǵaıyndaldy. Sizder olardyń qandaı sóz aıtqanyn bilesizder. Saraptama Ádilet mınıstrligimen birlesip júrgiziledi. Ol 1 aı júrgiziledi. Biz jaqyn arada osy saraptamany alamyz. Onyń qorytyndysy boıynsha jáne ár adamnyń aıtqan sózi negizinde olarǵa taǵylatyn aıyptyń baptary kórsetiledi", - dedi Bas prokýrordyń orynbasary.

Sondaı-aq Jandos Ómiralıev aıyp taǵylǵannan keıin jazany sot taǵaıyndaıtynyn aıtty.  Prokýratýraǵa tergeý nátıjesi men saraptama qorytyndysy jetkilikti negiz berse, olarǵa aıyp taǵylyp, jaýapqa tartylady.

Eske sala ketsek, buǵan deıin áleýmettik jelide Qazaqstan korparasıasyna baǵynbaıtynyn habarlaǵan bir top belsendiniń vıdeosy jarıalandy. Vıdeoda Petropavl qalasynyń turǵyndary Halyqtyq jumysshylar keńesin quryp, Qazaqstannan bólinip, "táýelsizdigin" jarıalaǵan. 

Jıynda 19 adam jańa deklarasıany, Jarǵy jobasyn, sımvolıkany, Halyq Keńesiniń mórin bekitip, 1937 jylǵy Qazaq KSR Konstıtýsıasy boıynsha ómir súretinderin aıtqan. Olar ózderin "Uly otan soǵysynda jeńiske jetken batyrlardyń urpaǵymyz" dep tanystyrǵan.