Búgin barsha musylman myń aıdan da qadirli sanaıtyn Qadir túnin kútedi. Jaqynda Almaty qalasynyń bas ımamy Tólebı Ospan redaksıamyzǵa suhbat berip, Qadir túnin qalaı ótkizý keregin aıtqan bolatyn.

"Qadir túni – qasıetti Quran Kárim túsken tún. Ramazannyń sońǵy on kúniniń taq túnderinde Qadir túnin kútemiz. Bul bıyl sáýirdiń 17–18 aralyǵyna túsip tur. Alaıda Qadir túni Ramazannyń on kúniniń birine jasyrylǵandyqtan, musylman adam barlyq taq túnderi úmit etip, Qadir túnin kútedi.  Sol túndi uıqymen emes qulshylyqpen ótkizýge tyrysady. Biraq ártúrli jumys jasaıtyn adam bar. Musylmannyń túnde jasaǵan qulshylyǵy ertesi kúni óziniń mindettelgen jumysyn oryndaýyna, jumysyn jaýapkershilikpen atqarýyna kedergi keltirip qoımaýy kerek. Qadir túnin kúttim eken dep jumysqa shyqpaı qoıýǵa bolmaıdy"– dep habarlady ımam.

Sonymen qatar, bul túni Alla Taǵalaǵa jaqyndaý maqsatynda kóptep qulshylyq etý keregin aıtty.

"Bul túndi ǵalymdarymyz "Alla Taǵalanyń meıirim qaqpasyn qaǵý" dep te ataıdy. Musylmandar Alla Taǵalanyń meıirim qaqpasy ashylǵansha qaqpasyn qaǵyp, meshitte ıtıkaf etip otyrady. Biraq bul asylynda er kisilerge arnalǵan. Áıel adam ıtıkafty óz úıinde jasalǵany abzal. Áıel adamnyń meshiti – óz bólmesinde"– dedi Tólebı Ospan.