Májilis tóraǵasy Erlan Qoshanov «Shevron» korporasıasynyń Eýrazıalyq bólimshesiniń Basqarýshy dırektory Derek Magnessti qabyldady. Taraptar kompanıa jumysyndaǵy otandyq úlesti arttyrý jáne áleýmettik jobalardy júzege asyrý jóninde pikir almasty.

Májilis spıkeri korporasıa basshylyǵyn Qazaqstandaǵy qyzmetiniń 30 jyldyǵymen quttyqtap, «Shevron» elimizdegi iri sheteldik ınvestor ekenin atap ótti.

Erlan Qoshanov Qazaqstan Prezıdentiniń, Úkimet pen Parlamenttiń basty mindeti – ulttyq múddelerdiń saqtalýyn eskere otyryp, sheteldik ınvestorlar úshin qolaıly jaǵdaı jasaý ekenin aıtty. Osyǵan baılanysty «Shevron» kompanıasyna birqatar usynys berdi. Atap aıtqanda, atmosferaǵa taraıtyn zıandy qaldyqtardy azaıtý, munaı hımıasyn damytý, munaı men gaz óńdeýdi kúsheıtý.

Qazaqstandyq úlesti arttyrýǵa basa nazar aýdaryp, jergilikti ónimdi satyp alý mańyzdy. Jergilikti servıstik kompanıalardy tartý kerek. Bizdiń elimizde damyǵan jáne básekege qabiletti bıznes bar. Olar ozyq halyqaralyq standarttar deńgeıinde jumys isteı alady. Búginde bul baǵytta biraz jumys atqarylyp jatyr. Degenmen, aýqymdy rezervter bar. Budan barlyq tarap utylmaıdy dep oılaımyn, – dedi Májilis spıkeri.

Erlan Qoshanov jýyrdaǵy saılaý naýqany kezinde depýtattardyń Qazaqstannyń batys oblystaryndaǵy turǵyndarmen ótken kezdesýinde kótergen túıtkildi máselelerge de tolyǵyraq toqtaldy. Sonyń biri – Atyraý oblysynyń Dossor eldi mekenindegi jáne Qulsary qalasyndaǵy apatty jaǵdaıdaǵy turǵyn úı máselesi men halyqty áleýmettik qoldaý. Budan bólek, qazaqstandyq jumysshylarǵa laıyqty jaǵdaı jasap, ádil eńbekaqy tóleý, vahta merzimin qysqartý, jergilikti kadrlardy daıarlaýdy kúsheıtý máselesi de keńinen qozǵaldy.

– Búginde elimizde munaı-gaz salasynda bilikti mamandar jeterlik. Biraz jerlesimiz sheteldiń bedeldi oqý oryndarynda bilim alyp, transulttyq kompanıalarda tájirıbe jınaqtady. Osyǵan baılanysty jergilikti mamandarǵa sheteldik áriptestermen birdeı jalaqy tólep, olarǵa senim artýlaryńyzdy suraımyz, – dedi Palata tóraǵasy.

Óz kezeginde, Derek Magness kompanıanyń eń basty resýrsy adam ekenin atap ótti. Ol jergilikti kadrlardy damytýǵa ınvestısıa salýǵa, sondaı-aq kompanıa ornalasqan osy aımaqtyń damýyna qoldaý kórsetýge daıyn ekendigin aıtty. Ol Májilis Tóraǵasyna kompanıanyń depýtattar tarapynan aıtylǵan barlyq usynystarǵa muqıat qaraıtynyn jetkizdi.

Sóz sońynda Erlan Qoshanov «Shevron» kompanıasynyń basshylyǵyn jergilikti turǵyndardyń ózekti máselelerin sheshýge jáne aımaqty damytýǵa belsene atsalysýǵa shaqyrdy.

Kezdesýge Májilis depýtaty Ádil Jubanov (Atyraý oblysynan), Edil Jańbyrshın (Mańǵystaý oblysynan) qatysty.

Májilistiń Baspasóz qyzmeti