Ulttyq qaýipsizdik komıteti tóraǵasynyń orynbasary, Shekara qyzmetiniń dırektory Erlan Aldajumanov Serik Kúdebaevtyń qashyp ketýine baılanysty pikir bildirdi.

"Kúdebaevtiń taý jaqta sharýa qojalyǵy bar. Jol kórsetetin adamdary da bolǵan shyǵar. Biz taý arqyly shekaradan shyǵyp ketken dep kúdiktenip otyrmyz", – dedi Shekara qyzmetiniń dırektory.

Vedomstvo basshysynyń aıtýynsha, qazirgi tańda UQK tergeý jumystaryn júrgizip jatyr, Bas prokýratýra qylmystyq is qozǵaǵanymen, onyń jaı-japsary aıtylmady.

Sonymen qatar, Erlan Aldajumanov Qazaqstannyń Shekara qyzmeti Qyrǵyzstandaǵy áriptesterinen aqparat suraǵanyn aıtty. Qyrǵyzstanda da bul fakt boıynsha qylmystyq is qozǵalǵan.

Eske sala keteıik, Serik Kúdebaev Qańtar oqıǵasy kezinde komendant retinde polısıa departamentiniń ǵımaratynan ketip, tártipsizdikke qatysýshylardyń qarý urlaýyna múmkindik berdi dep aıyptalýda.

Ol sot otyrysyna kelmeı qashyp ketken bolatyn. Keıin Kúdebaevtiń Qyrǵyzstanmen shekarany kesip ótip, Bishkekten Ystambulǵa ushqany belgili boldy. Oǵan halyqaralyq izdeý jarıalandy.