BAQ-ta  parlamenttik saılaýdyń daýys berý qorytyndylary týraly jalǵan hattamalar sýreti tarap ketken. Atalǵan sýret áleýmettik jelide qyzý talqylanýda.

Bir mandatty saılaý okrýgi boıynsha № 4 okrýgtiń № 99 saılaý ýchaskesiniń májilis depýtattaryna daýys berý qorytyndylary týraly ýchaskelik SK hattamalarynyń fotosýretteri bir kún buryn BAQ ta tarap ketti. Alaıda Almaty qalalyq aýmaqtyq saılaý komısıasy onyń jalǵan ekenin aıtty.

ASK da túsindirilgendeı, birinshiden, jarıalanǵan fotosýretterde Qazaqstan Respýblıkasy Ortalyq saılaý komısıasynyń 2023 jylǵy 20 qańtardaǵy № 18/672 qaýlysyna № 32 qosymshaǵa sáıkes hattama toltyrylǵan. Qujattyń mazmunynda saıası partıalardyń ataýlarynyń ornyna nómiri tórtinshi bir mandatty aýmaqtyq saılaý okrýgi boıynsha saılanǵan Qazaqstan Respýblıkasynyń Parlamenti májilisiniń depýtattyǵyna kandıdattar kórsetilgen.

Ekinshiden, hattamanyń túpnusqasy Ortalyq saılaý komısıasynyń 2023 jylǵy 20 qańtardaǵy № 18/672 qaýlysy boıynsha rásimdeledi. Al BAQ taǵy sýrette 28 kandıdattyń ornyna tek 6 úmitkerdiń aty-jóni kórsetilgen.

Úshinshiden,  saılaý kúni ýchaskede otandyq jáne sheteldik BAQ ókilderi men halyqaralyq uıymdardyń, saıası partıalardyń 5 baqylaýshysy bolǵan. Sonymen qatar úmitkerler ózderiniń senimdi ókilderin de saılaý prsessin baqylaýǵa jibergen.

Qazaqstan Respýblıkasynyń saılaý týraly konstıtýsıalyq zańynyń 43 babynyń 8 tarmaǵyna sáıkes, saılaý kezinde  daýys berýge qatysqan adamnyń ótinishi boıynsha oǵan komısıa tóraǵasy men hatshysynyń qoldarymen jáne saılaý komısıasynyń mórimen kýálandyrylǵan hattama berilýi kerek. Senim bildirilgen adamdar men baıqaýshylardyń birde-bireýi belgilengen tártippen kýálandyrylǵan hattamalardyń kóshirmelerin alǵan joq, tirkeý jýrnalynda  kóshirmelerdi alý faktisin rastaıtyn baqylaýshylar men senim bildirilgen adamdardyń qoldary qoıylmaǵan.

Tórtinshiden, hattamaǵa eki mór qoıylady. Olar túpnusqanyń kóshirmesindegi mór men ýchaskelik SK tóraǵasy men hatshysynyń qoly qoıylǵan mór.

Besinshiden, taratylǵan fotosýrette komısıa músheleriniń qoldarynan basqa qol qoıylǵan. Sondaı aq, qujattaǵy mór durys kórinbegendikten, onyń qandaı mór ekenin, qaı ýchaskege tıesili ekenin anyqtaý múmkin emes.

«Joǵaryda aıtylǵandardy eskersek, fotosýrettegi №99 ýchaskelik saılaý komısıasynyń hattamasy emes. Bul áreketti saılaý nátıjelerin burmalaý men dıskredıtasıalaý dep sanaımyz. Osyǵan baılanysty, Almaty qalasynyń aýmaqtyq saılaý komısıasy halyqty aldamaý úshin tek shynaıy aqparat taratýǵa shaqyrady», - dep qorytyndylady ASK.

Sondaı-aq, aýmaqtyq saılaý komısıasy jalǵan aqparat taratqandardy jaýapkershilikke tartý úshin quqyq qorǵaý organdaryna júginetinderin aıtty.