Munaıshylar narazylyq bildirgen soń Jańaózendik munaı kompanıalaryna qatysty tekseris komısıasy qurylǵan edi. Arnaıy komısıa birqatar zań buzýshylyqtar anyqtaǵan. 

"Ózenmunaıgaz" osy ýaqytqa deıin jumysqa kelmegen qyzmetkerlerge jalaqy tólep kelgen. Sonyń biri – belgili aqtaýlyq aıtysker. Ol aldymen shtatta teolog, keıin qoǵammen baılanys jónindegi maman qyzmetin atqarǵan. Sondaı–aq, keı qyzmetker kezektiń sońynda turǵanyna qaramastan jumysqa ózgelerden erte ornalasqan. Olardyń arasynda biliktiligi tómen mamandar da bar.

"Berilgen jalaqyny tekserý barysynda eńbek zańnamasynyń buzylǵany anyqtaldy. Ústeme jumystarǵa eńbek kodesinde belgilengen mólsherden artyq aqsha tólegen. "Ózenmunaıgaz" kompanıasynda eńbek tártibin buzý faktileri bar. Atap aıtqanda, aýstafıng eki adam jumysta uzaq ýaqyt bolmaǵan. Sonda da tolyqtaı aqshalary tólengen. Osyndaı zańbuzýshylyqtardy anyqtadyq, jumys jalǵasyn tabady",– dedi QazMunaıGaz  UK basqarma tóraǵasynyń orynbasary Dáýletjan Hasanov.

Merdiger mekeme qyzmetkerlerine arnaıy kıim men tamaq bermegen. Zeınetaqy jarnalary 2–3 aıǵa keshigip, júrgizýshiler kombınezon jáne tamaqpen qamtamasyz etilmegen. Kompanıanyń jobalyq qujattary joq, qaýipsizdik talaptary buzylǵan, ekologıalyq normalar saqtalmaǵan. Sonymen qatar, júk kólikteriniń GPS derekteri men ýaqyt kestesi tólenetin aılyqtyń áldeqaıda joǵary bolýy keregin kórsetti.