Áleýmettik jelide Petropavl qalasynyń máslıhat depýtaty Pavel Afanasevtiń telegram–arnasyndaǵy jazbasy qyzý talqylanyp jatyr. Depýtat óz jazbasynda Petropavl qalasynyń ataýyn ózgertkisi keletinderdi "máńgúrtter" dep ataǵan. 

"Qala nemese oblystyń ataýyn ózgertý jónindegi máseleni bizdiń qoǵamda tynyshtyq pen halyqtyń kóńil-kúıin, kelisim men ınternasıonalızmdi baǵalamaıtyndar kóteredi. Qalalardyń ataýyn ózgertýmen kópultty emes, monoultty memleket qurǵysy keletinder aınalysady. Máńgúrtter, Petropavldy ózgertýge baryńdar", – dep jazǵan ol.

Buǵan deıin ol halyqaralyq taqyryptaǵy belgisiz avtordyń birneshe jazbasyn bólisken. Ol jerde "Ýkraınadaǵy neonasızm qalaı kúsheıgeni" týraly jazylyp, 2014 jylǵy Ýkraına men Reseı arasyndaǵy qaqtyǵys Reseı prızmasymen sýretteledi. Jazbada ýkraınalyqtardy "nasık" dep ataıdy. Osy jazbany qalalyq depýtat "óte qyzyqty aqparat" dep telegram–arnasyna salyp qoıǵan.