Búgin Májilistiń jalpy otyrysynda "Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly" Zań qabyldandy.

Qujat aıasynda elektr samokattardyń jolda júrý tártibi retteledi. Atalǵan zań jobasyn Parlament depýtattary ázirlegen.

"Keıingi jyldary elektr samokattardyń, gıroskýterler men monodóńgelekterdiń paıda bolǵanyn kórip júrmiz. Bizge osyndaı jańa kólik quraldarynyń júrisin retteý máseleleri boıynsha ótinish kóp túsedi. Bul ásirese megapolıster úshin ózekti másele. Elektr samokattardyń joldarmen jáne trotýarlarmen júrýi jaıaý júrginshiler men júrgizýshilerge qaýip tóndirip jatyr", – dedi Májilis depýtaty Ekaterına Smyshláeva.

Onyń aıtýynsha, zań jobasy eki jyl buryn ázirlengen. Alaıda elektr samokattarǵa qatysty tehnıkalyq reglament tek 2022 jyldyń shildesinde qabyldandy.

"Búgin biz elektr samokattardyń júrisin retteý boıynsha túzetýler engizip otyrmyz. Jobaǵa sáıkes elektr samokattar jeke kólik quraly retinde tanylady, sondaı-aq saǵatyna 25 km jyldamdyqpen júretin kólik quraldary elektr samokat sanatyna jatady. Elektr samokattar velosıped joldary men jol jıekterinde erkin júre alady. Al trotýarlarda saǵatyna 6 kılometrden aspaıtyn jyldamdyqpen júrýge ruqsat etiledi. Bul jaıaý júrginshiler men júrgizýshiler úshin eń qolaıly sheshim", – dedi depýtat.

Onyń paıymynsha, trotýardaǵy jyldamdyqty shekteý – jaıaý júrginshilerdiń qaýipsizdigin qamtamasyz etedi.

"Elektr samokattar jol júrý bóliginiń oń jaq shetimen, onyń ishinde avtobýs jolaǵymen bir qatarda júrýine bolady. Alaıda, ol úshin júrgizýshi 18 jasqa tolýy jáne shlem kıýi kerek. Sondaı-aq onyń ústinde jaryq shaǵylystyratyn kıim men júrgizýshi kýáligi bolýy qajet", – dedi Ekaterına Smyshláeva.