Mártók – óńirdiń ekonomıkalyq jáne áleýmettik damýyna eleýli úles qosyp kele jatqan aýdan. Onyń aýdan bolyp qurylǵanyna da 80 jyldyń júzi bolypty. Jaqynda mártóktikter aýdannyń 80 jyldyq mereıtoıyn sán-saltanatymen atap ótti.

Aýdannyń mereıtoıyna ar­nalǵan saltanatty jıynǵa ól­keniń ósip-ónýine ár jyldary óziniń súbeli úlesin qosqan már­tóktik azamattar men azamatshalar, jergilikti turǵyndar qatysty. Mereıtoılyq jıyn aýdan ortalyǵyndaǵy Aýǵan soǵysyna qatysqan jaýyngerlerge qoıylǵan eskertkishti saltanatty jaǵdaıda ashýmen bastaldy. Aýǵan soǵysyna 87 mártóktik azamat qatyssa, sonyń ekeýi – Jaqsyǵalı Tá­jiǵulov pen Ana­tolıı Rý­daı sol soǵystan oral­map­ty. Eskertkishtiń saltanatty ashylý rásiminde aýdan ákimi Nurjaýǵan Qalaýov jı­nalǵandarǵa quttyqtaý sózin arnap, sonaý el basyna aýyr kún týǵan alasapyran kezde Uly Otan soǵysyna 3 myńǵa tarta jerlesimiz attanǵanyn, olar­­dyń teń jartysyna jýyǵy elge qaıtyp oralmaǵanyn eske aldy. Qazir aýdanda sol bir sum soǵystyń bel ortasynda bolǵan eki-aq ardagerdiń – Vladımır Sychev pen Vasılıı Lavrenúktiń qalǵanynyn atap ótti.

– Biz Uly Otan soǵysynda erlik­pen qaza tapqan jáne Aýǵan soǵysynan oralmaǵan jaýyn­gerlerimizdiń rýhyna taǵzym etemiz, olardyń esimderin ár­daıym maqtan tutamyz, – dep túıindedi oıyn aýdan ákimi. Me­reı­toıǵa arnalǵan mańyzdy sha­ranyń negizgi bólimi aýdandyq mádenıet úıiniń keń zalynda boldy. Zal qonaqtarǵa lyq toldy. Saltanatqa shaqyrylǵandardyń kóbi eńbek ardagerleri. Olardyń arasynda bir kezderi eńbegimen el baılyǵyn eselegen eńbek adamdary – malshylar, mehanızatorlar, sharýashylyq basshylary bar.

Saltanatty jıynda baıandama jasaǵan aýdan ákimi Nurjaýǵan Qalaýov aýdan tarıhyna toq­talyp, alǵashqy ujymshar, már­tók­tikterdiń Uly Otan soǵysyna qatysýy jaıyn áńgime ózegine aınaldyrdy. Mártókten bes Keńes Odaǵynyń Batyry shyqqanyn tilge tıek ete kelip, Aleksandr Ba­týrın, Konstantın Gýbın, Mı­haıl Kojemákın, Evdokım Maz­kov jáne Fedor Ozmıteldiń esimderin jerlesteri jadynda jańǵyrtty. Sondaı-aq, Sosıa­lıs­tik Eńbek Erleri Nıkolaı Go­robes, Evdokıa Ivoshenko, Ivan Ponomarenko, Marıa Chepı­gına jáne Grıgorıı Shvedtiń attaryn da maqtanysh sezimmen atap ótti.

Ol bıyldyń ózinde aýyl sharýashylyǵy salasynda 7,5 myń tonna et, 39,2 myń tonna sút óndirilip, 5,4 mıllıon dana ju­myrtqa, 20,8 myń tonna dán­di jáne 1,7 myń tonna maıly da­qyldar jınalǵanyn málim etti. Óner­kásip salasynda da aýyz toltyryp aıtarlyqtaı jetistikter bar ekenine aıryqsha toqtaldy. Búginde aýdanda jumys isteıtin 11 kásiporynnyń deni aýyl sha­rýashylyǵy ónimderin qaıta óńdeýmen aınalysady. Óńir basshysy mártóktikterdiń arasynda Omarbek Berdıev, Aleksandr Varúta, Ramazan Dilmaǵambetov, Naǵashybaı Erdáýletov, Tatána Mákısheva, Anatolıı Kalújnyı, Anatolıı Iablýnovskıı, Raf­hat Mıftahýtdınov, Úsen Ja­manshalov, Raýl Mır-Haıdarov, Aqqaǵaz Dosjanovtardyń esimi elge jaqsy tanystyǵyn, olardyń aýdannyń damýyna súbeli úles qosqan jandar ekenin alǵa tarta sóıledi.

Saltanatty sátte Nurjaýǵan Qalaýov aýdannyń áleýmettik já­ne mádenı damýy jolynda eseli eńbek etken jáne ter tógip júrgen bir top mártóktikterdi ózgelerge úlgi etti. Ǵabıbolla Oınaqulov Aýdannyń qur­metti azamaty atansa, Qymbat Súıinǵalıeva, Ivan Klassen, Shamıl Sarınov, Vasılıı Bondarev, Alfıa Jú­sipova, Vıktor Goncharýk, Murat Aınazarov, Valerıı Bobyr, Ákim­ala Qarabalın, Se­rik Jaq­sybaevtar «Jyl adamy-2015» qurmetine laıyq dep tanyldy.

Saltanatty marapattaý rá­siminen keıin Qazaqstan Res­pýblıkasy Parlamenti Senaty­nyń depýtaty Marat Taǵymovtyń jergilikti turǵyndardy aýdan­nyń mereıtoıymen qut­tyqtaǵan jedelhaty oqyldy. Óz kezeginde jazýshy Raýl Mır-Haıdarov osy óńirinde ótken balalyq shaǵyn eske túsirip, týǵan to­pyraǵynyń jany jaısań adam­­dary jaıly áńgimeledi. Odan keıin minbege kóterilgen aýdannyń burynǵy ákimi Se­rik Botaǵarın de jergilikti tur­ǵyndardy, qonaqtardy mereıtoımen quttyqtap, jyly le­bizin bildirdi. Saltanatty sha­ranyń sońy jergilikti óner ujymdarynyń konserttik baǵ­darlamaǵa ulasty.

Mereıtoı qurmetine uıym­dastyrylǵan báıgege 16 sáıgúlik jiberildi. Júırikterdiń arasynan Rodnıkovka aýylynyń shabandozy Janarbek Aqshyraqov mingen Malysh atty sáıgúligi top jardy. Taı jarysta Zvezdochka atty taıdy tizgindegen Ǵasyr Qystaýbaıuly bas júldege ıe boldy. Sol sıaqty qyz qýý, aý­daryspaq sekildi ulttyq oıyndar uıymdastyryldy. Ásirese, kókpardy qyzyqtaýshylar kóp boldy. Boz kilemde kúsh synas­qandar arasynda Dáýren Ermekov túıe balýan atandy. Bul kúni toǵyz­qumalaq, asyq atý sekildi ulttyq oıyndardan da jarystar ótkizildi.

Derekkóz: "Egemen Qazaqstan"