Qazaqstanda qarjy pıramıdasynyń qurbandarynyń jalpy sany úsh esege artty. Olardyń arasynda 11 jasqa tolmaǵan alty bala da bar.

"Aǵymdaǵy jyldyń qańtar–sáýir aılarynda 382 adam qarjylyq pıramıdalardyń qurbany boldy. Bul bir jyl burynǵy statısıkadan 3,3 esege kóp. Olardyń ishinde 11 jasqa tolmaǵan alty bala, 16–17 jas aralyǵyndaǵy úsh kámeletke tolmaǵan bala, 18 jastaǵy toǵyz adam bar ", – deıdi sarapshylar.

Sonymen qatar, elimizde "Qarjy pıramıdasyn qurý jáne basqarý" baby boıynsha 4 aıda 45 qylmystyq is qozǵalǵan. Eń kóp qylmystyq quqyq buzýshylyq Almaty qalasynda tirkelgen. Odan keıingi orynda Shyǵys Qazaqstan oblysy men Astanada tur. Abaı, Qaraǵandy oblystary men Shymkent qalasy da bul qatardan qalyspaıdy.

Qarjy pıarmıdasyn qurýshylar qurbandaryn ınternet–resýrstar arqyly tarta bastaǵan. Qarjy monıtorıńi agenttiginiń málimetinshe, bıylǵy jyldyń úsh aıynda Qazaqstanda qarjylyq pıramıda belgileri bar tórt myńǵa jýyq saıt pen akkaýnt buǵattalǵan.

Zardap shekkenderdiń 71,5 paıyzy áıelder, dep habarlaıdy finprom.kz aqparattyq portaly. Sondaı–aq, tórt aıda 11 zeınetker men úsh stýdent qarjy pıramıdalarynyń qurbany bolǵan.