AMANAT partıasynyń elektoraldy ýádeleriniń negizinde kitaphana qyzmetkerleriniń aılyq jalaqysyn arttyrý qarastyrylǵan. Alaıda, búginde bul sheshim tek mádenıet salasyna qarasty 4 myńnan astam kitaphanashylardy ǵana qamtyp, qalǵan 8 myń pedagogıkalyq salaǵa jatatan kitaphana qyzmetkerlerine taralmaı otyr. Bul týraly búgin Májilis depýtaty Erkin Ábil Palatanyń jalpy otyrysynda Qazaqstan Respýblıkasy Premer-Mınıstriniń orynbasary – Eńbek jáne halyqty áleýmettik qorǵaý mınıstri Tamara Dúısenovaǵa óziniń depýtattyq saýalyn joldady.

Depýtattyń aıtýynsha, saýalǵa jalpy elimizdiń bilim salasyna baǵynysty kitaphana qyzmetkerleriniń, onyń ishinde Qostanaı oblysynyń  mektep kitaphanashylarynyń ujymdyq úndeýi sebep boldy.

Mysaly, Mádenıet salasynyń kitaphanashylary negizgi quramǵa jatady jáne eńbekaqyny A (meńgerýshiler) jáne V (qatardaǵy kitaphanashylar) tólem toptary boıynsha alyp, olarǵa sanaty úshin qosymsha aqy tólenedi. Zıatkerlik mektepterindegi kitaphanashylar pedagog-kitaphanashy retinde attestasıadan ótken. Al orta bilim uıymdarynyń kitaphanashylary 2016 jyldyń 1 qańtarynan bastap biliktilik sanaty úshin qosymsha tólemnen aırylyp, mektep kitaphanalarynyń meńgerýshileri kómekshi personalǵa jatqyzylyp, S1 sharýashylyq bólimshe meńgerýshisi eńbek aqy tobyna engizilgen.

Qazaqstan Respýblıkasynda 8 myńǵa jýyq mektep kitaphanashysy jumys isteıdi, olardyń 30 paıyzy shaǵyn jınaqtalǵan mektepterde tolyq emes stavkada, olar 3,5 mıllıon mektep oqýshysy men jarty mıllıon muǵalimge qyzmet kórsetedi. Eń joǵary eseppen alǵanda 136 myń teńgeden, barlyq shegerimderden keıin, kitaphana meńgerýshisi 96 myń teńge qolyna aılyq alady. Jalpy bilim beretin mektepterdiń shtattaryna sáıkes 21 synyp jınaqtalsa, dırektordyń orynbasarlary, psıholog, medbıke, býhgalterdiń 1,5 stavkasy engizilgen. Biraq bul norma mektep kitaphanashysyna qoldanylmaıdy, olar úshin qosymsha stavka tek 30 synyp jınalsa engiziledi. Bul búginde jumysynyń júktemesi joǵary kitaphana qyzmetkerleri úshin saladaǵy kadrlardyń tapshylyǵy men turaqtamaýyna alyp kelýde.

Osyǵna sáıkes, AMANAT  partıasy fraksıasy kelesi usynystardy engizedi:

Birinshiden, mektep kitaphanashylarynyń eńbekaqysyn mádenıet salasyndaǵy kitaphanalardaǵy eńbekaqy deńgeıine deıin arttyrý týraly máseleni sheshýińizdi, Úkimettiń tıisti qaýlylaryna ózgeris engizýińizdi suraımyz.

Ekinshiden, mektep kitaphanasynyń 1 qyzmetkerine júkteme normatıvterin qaıta qarap, mektep kitaphanasy meńgerýshisiniń 14 synyp jınaqtalsa 1 stavka, 21 synyp  jınaqtalsa - 1,5 stavka, 28 klass  jınaqtalsa - 2 stavka ólshemsharttaryn bekitý ózekti.

Úshinshiden, oqý qorymen jumys istegeni úshin 30 paıyz qosymsha tólemderdi negizgi laýazymdyq jalaqysy emes laýazymdyq jalaqynan eseptep, esepteý tártibin qaıta qarastyrý abzal.