Reseılik ánshi Grıgorıı Lepstiń dırektory Vladımır Ýrúpın ánshiniń Qonaevtaǵy konserti toqtatylǵannan keıin Qazaqstan týraly pikirimen bólisti.

"Qazaqstan–naǵyz rýsofobıalyq el. Biraq odan Grıgorıı Vıktorovıchtiń ustanymy ózgermeıdi. Ózge elder ne dese de, biz óz elimizdi qoldaımyz. Konsertti toqtata bersin. Qazaqstansyz da tirligimizdi jasaı beremiz. Biz óz elimizdi qoldaımyz jáne jeńis bizdiki bolý úshin qolymyzdan kelgenniń bárin jasaımyz. Bul oqıǵa qazaqstandyqtar esinen adasyp jatqanynyn taǵy bir kórinisi boldy", – dedi Ýrúpın Gazeta.Ru basylymyna.

Sonymen qatar, ol Lepstiń endi Qazaqstanǵa barmaıtynyn aıtty.

"Bizdi ystyq peıilmen kútpeıtin elderge barmaımyz, bul AQSH qa barǵanmen birdeı. Dushpandar bizge ne istese, biz de olarǵa sony isteımiz", – dedi ol.

Eske salaıyq, Leps 8 shildede Qonaev qalasynda konsert qoıýdy josparlaǵan bolatyn. Bılet baǵasy 50 myń teńgeden bastalyp, 1 mıllıon teńgege deıin baǵalanǵan. 

Buǵan deıin Reseı ánshileri Nıkolaı Baskov pen Grıgorıı Leps ýkraın tankterin joıǵandarǵa bir mıllıon rúblden tóleýge daıyn ekenin málimdegen. Sondyqtan qazaqstandyqtar soǵysty qoldaıtyn ártistiń elimizde óner kórsetýine  narazylyq bildirdi.

Kóp uzamaı Grıgorıı Lepstiń konserti ótpeıtini belgili boldy.