Qazaqstanda 4 paıyzdyq jeńildetilgen avtokredıt baǵdarlamasy toqtatylady. Bul týraly ındýstrıa jáne ınfraqurylymdyq damý mınıstri Marat Qarabaev málimdedi.
Jeńildetilgen avtokredıtke bólingen 100 mlrd teńgeden revolverlik júıe arqyly túsken qarjynyń bári qoǵamdyq kólikterdi jańartýǵa jumsalady. Al 4 paıyzdyq jeńildetilgen avtokredıt baǵdarlamasyn qaıta jańartý josparlanyp otyr.
"Qaıta jańartý kezinde avtokólikti kredıtteý baǵytyn avtobýstardy nesıeleý baǵytyna aýystyramyz ba degen jospar bar. Elimizde qoǵamdyq kólikterdiń kóbi tozǵan. Mysaly Qostanaıda avtobýstardyń 90 paıyzy, Oral, Taldyqorǵanda 70 paıyzy eskirgen. Biz baǵdarlama aıasynda túsken aqshaǵa qansha adam kólik ala alady, eger onyń ornyna avtobýstardy qarjylandyrsaq, tıimdiligi qalaı, sonyń bárin eseptedik. Máselen, qoǵamdyq kólikterdi kúnine 9 mln 300 myń qazaqstandyq paıdalanady eken. Sondyqtan biz aqshany kóbirek avtobýstar satyp alýǵa baǵyttaımyz dep otyrmyz", - dedi Qarabaev Aqorda kýlýarynda.
Aıtýynsha, qarapaıym halyq naryqtyq stavkamen kólik ala alady.
"Ol jerde eki baǵdarlama bar ǵoı. Birinshisine kezeń-kezeńmen 82 mlrd teńge bólindi. Ol qazir revolverlik ádis boıynsha óz aldyna istep tur. 82 mlrd teńge boıynsha 10-15% bastapqy jarna, qatelespesem nesıe mólsherlemesi 5% bolǵan. Bul baǵdarlama ári qaraı jalǵasady. Biraq odan túsken aqshany qaıda baǵyttaıtynymyzdy qosymsha habarlaımyz", - dep túsindirdi ındýstrıa mınıstri.
