Túrmede otyrǵan Qaırat Satybaldy nemere aǵasy, Qazaqstannyń burynǵy prezıdenti Nursultan Nazarbaevqa Úshqońyr jaılaýyndaǵy rezıdensıany syıǵa tartqan. Bul týraly Azattyq radıosy málimdedi. 

2014 jyly Almaty oblysy Qarasaý aýdany Shamalǵan aýylyndaǵy jeke bólingen 7 gektardaı aýmaqta záýlim saraı salynǵan. 2016 jylǵy resmı tirkeý kezinde bul jyljymaıtyn múlik Qaırat Satybaldynyń menshigi bolyp jazylǵan.

“Bıyl sáýirdiń ortasynda Satybaldynyń atynda turǵan jaılaýdaǵy rezıdensıa nemere aǵasy, Qazaqstannyń burynǵy prezıdenti Nursultan Nazarbaevtyń ıeligindegi "Elbasy" qorynyń menshigine ótken”, – delingen zertteýde.

Memlekettik jyljymaıtyn múlik kadastry men "Azamattarǵa arnalǵan úkimet" portalynyń jaýabynda múliktiń menshik quqyǵy syıǵa tartý sharty boıynsha ózgergeni aıtylǵan.

Eske salaıyq, Qaırat Satybaldy byltyr qyrkúıekte serikterimen birge 40 mıllıard teńgeni talan–tarajǵa saldy degen aıyppen 6 jylǵa sottalǵan bolatyn. Astana qalasy №2 Baıqońyr aýdandyq sotynyń úkiminde Satybaldynyń múlkin tárkileý de jazylǵan. Biraq qandaı múlik ekeni anyq kórsetilmegen.

Jer kadastri derekterinde 12,5 gektar jerde ornalasqan saltanatty saraı men kotejder Satybaldynyń beıresmı áıeli Ásel Baqtıarqyzynyń ıeliginde ekeni kórsetilgen.

"Byltyr qarashada jemqorlyqqa qarsy kúres agenttigi Qaırat Satybaldynyń ústinen ekinshi qylmystyq is qozǵap, tergep jatyrmyz dedi. Agenttik Satybaldy men onymen baılanysy bar adamdardan 1 mıllıard dollardan astam qarajat qaıtarylǵanyn aıtty, biraq ázirge tergeý aıaqtalǵany týraly resmı habarlanbady. Demek qylmystyq jazaǵa tartylyp, múlki tárkilengen adamnyń atyndaǵy múliktiń basqa tulǵanyń ıeligine aýysqanyna kýá bolyp otyrmyz", – delingen materıalda.

Aıta keteıik, buǵan deıin Qaırat Satybaldynyń qamaýda otyryp Almatydaǵy záýlim qonaq úıdi satyp alǵany jóninde aqparat taraǵan bolatyn. Alaıda Antıkor bul aqparatty joqqa shyǵardy.