Qasym-Jomart Toqaev Ýkraına men Reseı soǵysyna qatysty Qazaqstannyń ustanymyn aıtty. Bul týraly ol Aqordada Germanıa Prezıdenti Frank-Valter Shtaınmaıermen kelissózderden keıingi BAQ ókilderine birlesken málimdeme barysynda málimdedi. 

Toqaevtyń aıtýynsha, Qazaqstan Ýkraına men Reseı arasyndaǵy soǵysty toqtatý úshin óz úlesin qosýǵa daıyn. 

"Men bul kúrdeli máselege qatysty ustanymymyzdy aıqyndadym. Birinshiden, biz BUU Jarǵysyn qatań saqtaýymyz kerek. Árıne, Birikken Ulttar Uıymyn álemde teńdesi joq ári ámbebap uıym retinde qoldaýǵa tıispiz.Ekinshiden, biz Qytaıdyń, sondaı-aq basqa da memleketterdiń barlyq beıbit bastamasyn qoldaýymyz qajet", – dedi Qasym-Jomart Toqaev. 

Budan bólek, memleket basshysy Reseı men Qazaqstan arasyndaǵy baılanysty saqtap qalatynyn da atap ótti. 

"Jaqyn arada Ýkraınadaǵy qarýly qaqtyǵys toqtaıdy dep úmittenemiz. Sodan keıin álemniń osy bóliginde berik beıbit ómir ornaıtyny týraly sóz qozǵaı alamyz. Qazaqstanǵa keletin bolsaq, biz osy maqsatqa qol jetkizýge óz úlesimizdi qosýǵa daıynbyz. Sonymen qatar biz – Reseımen strategıalyq seriktespiz jáne birneshe uıymnyń múshesi ekenimizdi atap ótken jón. Sondyqtan bizdiń maqsatymyz – ekijaqty jáne halyqaralyq uıymdar aıasynda ózara yntymaqtastyǵymyzdy nyǵaıtý úshin Reseımen tyǵyz baılanysty saqtaý", – dedi memleket basshysy.