Qoǵam qaıratkeri Arman Shoraev áleýmettik jelidegi paraqshasynda ózine qatysty qýǵyn–súrgin bastalǵanyn málimdedi.
Onyń aıtýynsha, bılik áriptesteri men jaqtastaryna qysym jasaǵan.
"Jap–jańa Qazaqstannyń jańashyl bıligi meniń aınalamdaǵy adamdarǵa, áriptesterime, jaqtastaryma túrli sebeptermen qysym jasaýdy bastap ketti. Jýrnalıs retinde jasaǵan jumystarymnan min izdep, arhıv aqtarýǵa kóshti. Kóptegen jobalardy birge júzege asyrǵan pikirlesterimdi zańsyz tergep-tekserýde. Keıbireýin tipti zańsyz shetelge shyǵarmaı, zańsyz tintýler jasaýda. Sondaǵy kózdegenderi meniń aýyzymdy jabý! Men osy azamattyq ashyq ustanymǵa kóshkende aldymnan ne shyǵatynyn bilip kelgen adammyn, shyraqtarym! Meniń ustanymymnan aınytam dep tekke terlemeńder! Meniń aınalamdy zańsyz timiskilep, advokattardan "Arman bılikke kelsin, jolyqsyn, anaýyn qoısyn, mynaýyn qoısyn" degen sálemdeme joldaǵannan túk shyqpaıdy!" – dedi Shoraev.
Sonymen qatar, ol Qarjylyq monıtorıń agenttigi tekseris júrgizip jatqan "Qazaqstan barysy" jobasy jaıly da aıtty.
"Men júzege asyrǵan "Qazaqstan Barysy" jobasyn da tilge tıek etipsińder, aınalaıyndar, ıdeıa meniki bolǵanymen, bul joba qazir halyqtyń qazynasyna aınalǵan. Atalaryńnyń asy men naýryzda ǵana esterińe túsetin qazaq kúresin, túıe balýandardy elge tanytyp, sondaı joba jasasańdar, senderge kim qoı dedi?! Meni qaralap, jemqor qylyp, halyqtyń aldynda qarabet qylýdy kózdegen ekensińder, aq jol! Bir qýanatyny – qazir halyq ózgergen, kózi ashyq, bılik ne aıtsa soǵan quldyq urmaıtyn qoǵam qalyptasyp kele jatyr! Sol úshin de senderdiń saparlaryń qysqa! Saılaýda ádildiktiń kózin oıyp turyp daýysymdy urlap aldyńdar, biraq meniń azamattyq kózqarasym men sóz bostandyǵymdy urlaı almaısyńdar!Qurmetti dos-jaran, nıettes-pikirlester, bıliktiń jańa stıldegi qýǵyn-súrgini men sovetskıı shań basqan qysymyna qynjylatyn men emes, men aqpyn" – dep jazdy Shoraev.
