Almatyda zańger Aıman Asanovany óltirgen er adam 1,5 jylǵa sottaldy. Ony burynǵy kúıeýi pyshaqtaǵan, dep habarlaıdy Zakon.kz.

Almaty sotynyń habarlaýynsha, alqabılerdiń úkimi boıynsha aıypker afekt jaǵdaıynda kisi óltirgeni úshin kináli dep tanyldy. Sotqa deıingi tergeý organy N. ajyrasqannan keıin múlikti bólý boıynsha janjalǵa baılanysty burynǵy jubaıyn maqsatty túrde óltirdi dep aıyptady (QK-niń 99-b. 1-b.). Qylmystyq isti qaraýǵa 10 alqabı qatysqan.

Zań boıynsha sottalýshynyń kináli nemese kinásizdigi týraly úkim árbiri 1 daýysqa ıe alqabıler men sýdıanyń daýys berýi arqyly qabyldanady. 

"Alqabıler N. afekt jaǵdaıynda kisi óltirgeni úshin kináli degen úkim shyǵardy. Olar N. men jábirlenýshi arasynda janjal shyǵyp, qaqtyǵys barysynda jábirlenýshi N.-nyń er-azamattyq ar-namysy men qadir-qasıetin qorlaı bastady jáne qalǵan múlikti alyp ketemin dep qorqytty degen qorytyndyǵa keldi. Bul rette A. tergeýde anyqtalmaǵan pyshaqty alyp, N.-dy qýalap júrip, pyshaqty sermeı bastaǵan. Aıypker A.-nyń sózderin óreskel qorlaý retinde qabyldap, kenetten paıda bolǵan qýatty psıhıkalyq tolqý (afekt) jaǵdaıynda jábirlenýshiniń qolynan pyshaqty tartyp alyp, moıyn men bas aımaǵyna soqqy jasaǵan. Jaraqat saldarynan jábirlenýshi aýrýhanada kóz jumdy. İs boıynsha keshendi sot psıhologıalyq-psıhıatrıalyq saraptamasynyń qorytyndysy bar, saraptamaǵa sáıkes N. qylmys jasalǵan ýaqytta jábirlenýshiniń arandatýshylyq minez-qulqynyń nátıjesinde paıda bolǵan, qysqa merzimdilik, ótpelilik jáne kenetten oryn alýymen sıpattalǵan qýatty psıhıkalyq tolqý - fızıologıalyq afekt jaǵdaıynda bolǵan", – delingen Almaty sotynyń habarlamasynda.

QK-niń 101-b. 1-b. (afekt jaǵdaıynda kisi óltirý) sanksıasy bas bostandyǵynan 3 jylǵa deıin shekteý nemese aıyrý túrindegi jaza taǵaıyndalady.⠀

Prokýrordyń aıyptaý aktisinde aýyrlatatyn mán-jaılardyń joq ekeni kórsetilgen.

Zań boıynsha (QK-niń 55-b. 2-b.) aıypty jeńildetetin jáne aýyrlatatyn mán-jaılar bolmaǵan kezde jaza 1 jyl 6 aıdan (3 jyldan 1/2) aspaýy tıis. Alqabıler soty N.-ǵa 1 jyl 6 aı bas bostandyǵynan aıyrý jazasyn taǵaıyndady.

Úkim zańdy kúshine engen joq.