Qańtar oqıǵasy kezinde Semeı qalasynyń polısıasynda azaptalyp óltirilgen Jandos Jotabaevtyń isi boıynsha aıyptalǵan ýaqytsha qamaý ızolátorynyń feldsheri Gúlmıra Tóleýbekova bir jylǵa shartty túrde sottaldy. Bul jóninde "Vlast basylymy habarlady. 

Sot Tóleýbekovany úsh jyl medısına mekemelerinde jumys isteý quqyǵynan aıyryp, moraldyq ótemaqy retinde Jotabaevtyń otbasyna 500 myń teńge tóleý mindettedi. Sonymen qatar, jábirlenýshiler ótemaqy qorynan 30 630 teńge óndiredi.  

Gúlmıra Tóleýbekovaǵa "kezdeısoq bir adamnyń ólimine ákelgen medısına qyzmetkeriniń kásibı mindetin tıisti dárejede oryndamaý" baby boıynsha aıyp taǵylǵan. Al feldsherdi qorǵaýshylar taraby onyń Jotabaev ólimine qatysy joq dep habarlap, bul is boıynsha birinshi kezekte ony azaptaǵan polısıa qyzmetkerleri men ýaqytsha qamaý ızolátoryn jaýapqa tartý qajettigin aıtqan.

Buǵan deıin Jotabaevtyń ólimine baılanysty "qatigez, adamgershilikke jatpaıtyn nemese qadir-qasıetti qorlaıtyn qarym-qatynas, azaptaýlar"  baby boıynsha polısıa qyzmetkerleri Álisher Qanaqynov pen Ersultan Aǵzanovqa aıyp taǵylǵan. Olardyń sot prosesi endi ǵana bastaldy.

Eske sala keteıik, Jandos Jotabaev byltyr 6 qańtarda "beıbit mıtıńke qatysqany úshin" ustalǵan. Ol polısıa bólimshesinde eki kún qamaýda bolyp, keıin ýaqytsha qamaý ızolátoryna aýystyrylǵan. 17 qańtarda ızolátor qyzmetkerleri jedel járdem shaqyryp, Jotabaevtyń qaıtys bolǵanyn habarlaǵan. Jandos Jotabaevtyń baýyry 2022 jyly aqpanda zertteý kezinde marqumnyń ókpesinen suıyqtyq tabylǵanyn, mundaı jaǵdaı qatty soqqyǵa jyǵylǵan adamda bolatynyn aıtqan. Baýyrynyń aıtýynsha, onyń 11 qabyrǵasy synǵan.