Parlament senaty "Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly" zańdy maquldady. Jańa zańnamaǵa sáıkes endi 18 jastan asqan azamattar ǵana samokat aıdaı alady.
Senator Evgenıı Bolgerttiń aıtýynsha, zań boıynsha "elektrondyq samokat" uǵymy engiziledi.
"Ol eń joǵary konstrýktıvtik jyldamdyǵy saǵatyna 25 kılometrden aspaıtyn kólik quraly dep tanylady jáne olardyń qozǵalysy úshin oryndar aıqyndalady. Sondaı-aq samokat júrgizýshileri úshin birqatar tyıym engiziledi. Atap aıtqanda, zańmen engizilgen sharttar men tyıymdardy saqtaı otyryp, elektr samokattarǵa joldyń júris bóliginiń oń jaq sheti boıynsha júrýge jol beriledi", - dedi senat depýtaty.
Samokat júrgizýshisi 18 jasqa tolǵan bolýy shart, sonymen qatar kez kelgen sanattaǵy kólikti basqarý quqyǵyn beretin júrgizýshi kýáligi, túımelengen dýlyǵa, al táýliktiń qarańǵy ýaqytynda ústinde jaryq shaǵylystyratyn zat bolýǵa tıis.
Zańda shaǵyn elektr kóligi men elektrosamokat júrgizýshileriniń quqyqtary men mindetteri belgilengen.
Budan bólek, basqa quzyretti organda tirkelgen kólikterdiń "Jol qozǵalysy týraly" zańda kózdelgen talaptarǵa sáıkestigin tekserý úshin ishki ister organdary qyzmetkerleriniń kólikterdi toqtatýynyń negizderin belgileıtin túzetýler engizildi.
Kólikterdi memlekettik tirkeý týraly kýálikterdi, júrgizýshi kýálikterin jáne memlekettik tirkeý nómirlik belgilerin daıyndaý salasynda memlekettik monopolıa engizilmek. Bul qyzmet túrlerin júzege asyrý quqyǵy QR İİM janyndaǵy sharýashylyq júrgizý quqyǵyndaǵy respýblıkalyq memlekettik kásiporynyna beriledi.
"Ruqsattar jáne habarlamalar týraly" Zańy kólik júrgizýshilerin daıarlaý jónindegi oqý uıymdarynyń qyzmetin bastaý nemese toqtatý týraly habarlamanyń jańa túrimen tolyqtyrylady.
"Májilis qabyldaǵan zań jeke júrip-turý quraldaryn paıdalaný tártibin quqyqtyq retteý salasyndaǵy alǵashqy qadam. Sonymen qatar, engiziletin quqyqtyq novelalardy tájirıbede synaqtan ótkizýdi, sondaı-aq elektr samokattar men shaǵyn elektr kólikterin paıdalaný tártibin retteýdiń halyqaralyq tájirıbesin eskere otyryp, bolashaqta óziniń zańnamalyq sheshimin talap etetin birqatar másele bar", - dedi Bolgert.
Senat májilis qabyldaǵan zańdy maquldap, prezıdenttiń qol qoıýyna jiberdi.
Pikir qaldyrý