Keshe Májilistiń jalpy otyrysyna jylýmen qamtý máseleleri týraly Joǵary aýdıtorlyq palatanyń esebin tyńdaldy.

Memleket basshysynyń 2022 jylǵy qarashadaǵy Jarlyǵyna sáıkes, Joǵary aýdıtorlyq palata tóraǵasy jylyna eki ret Májilis depýtattaryna esep berýge tıis. Bul – atalǵan palatanyń alǵashqy esebi.

Jalpy osy saladaǵy túıtkildi máselelerdi talqylaý shamamen úsh saǵatqa sozyldy.

Ótken qysta Ekibastuzda, Petropavlskide, Rıdderde, Rýdnyıda turǵyndar jylýsyz qaldy. Bul – jyldar boıy qordalanǵan problemalardyń saldary. Memleket basshysy osy máselelerdi únemi baqylaýynda ustap otyr. Úkimetke biraz naqty tapsyrma berdi. Alaıda jylý-energetıka júıesin tolyqqandy jańǵyrtý bastaldy dep aıtýǵa áli erte. Joǵary aýdıtorlyq palatanyń esebi de osy saladaǵy olqylyqtardy anyq kórsetti, – dedi Májilis tóraǵasy.

Májilis depýtattary tarapynan biraz synı pikirler aıtyldy. Jaýapty mınıstrlikter ókilderine halyqty tolǵandyryp otyrǵan eń ózekti saýaldar qoıyldy. Alaıda depýtattardyń deni mınıstrlerdiń bergen jaýabyna qanaǵattanǵan joq.

Úkimet músheleriniń bergen jaýaptarynan áli de máselelerdiń tolyq sheshilmeı jatqanyn baıqap otyrmyz. Sondyqtan jylýmen qamtamasyz etý máselesi aldaǵy ýaqytta da depýtattardyń erekshe baqylaýynda bolady. Kelesi sesıada biz mindetti túrde bul taqyrypqa qaıta oralyp, Úkimet músheleriniń esebin taǵy da tyńdaýymyz qajet, – dedi Erlan Qoshanov.

Májilis tóraǵasy depýtattardyń energetıkalyq qadaǵalaýdy kúsheıtý týraly usynysyn qoldady. Sonymen qatar jylý salasyna tikeleı jaýapty memlekettik organdardyń jaýapkershiligin aıqyndaý úshin ókilettikterdi qaıta qaraý kerektigine nazar aýdardy.

Jıyn sońynda Erlan Qoshanov jaýapty mınıstrlikterge jylytý maýsymyna daıyndyqty jedeldetý kerektigin eskertti.