Astanadaǵy Kaspi fılıalynda adamdardy kepilge alǵan er adamnyń denesi men qolyna jarylǵysh zat bolǵan. Bul týraly "Qazınform" basylymyna bergen suhbatynda ishki ister mınıstriniń birinshi orynbasary Marat Qojaev aıtty. Ol shabýyl jasaýshy nemen qarýlanǵan degen suraqqa jaýap berdi.

"Onyń tapanshaǵa uqsaıtyn zaty boldy. Onyń ústine denesi men qolyna qoldan jasalǵan jarylǵyshqa uqsas zat bekitilgen. Qazir bul zattar saraptamaǵa jiberildi. Olardyń qanshalyqty belsendi jarylǵysh qurylǵy nemese pishin ekenin – saraptama anyqtaıdy", - dedi Marat Qojaev.

Sondaı-aq, İİM basshysynyń birinshi orynbasary kepilge alynǵandardy bosatý jónindegi arnaıy operasıanyń basqa da jaı-japsaryn aıtyp berdi.

"Adamdy neǵurlym tezirek anyqtasaq, onymen kelissóz júrgizý ońaıyraq. Bul jaǵdaıda onyń týystaryn qostyq. Biz ony sýretke túsirip, derekqorlarymyzdy qarap, adamnyń jeke basyn anyqtadyq. Ol bastapqyda ózin múldem basqa esimmen tanystyrdy. Biz Dılshot degen adammen kelissóz júrgizip jatqan edik", - deıdi Marat Qojaev.

Keıin, onyń aıtýynsha, kúdikti kim ekeni sýretten anyqtalǵan. Bul Jambyl oblysy, Grodekovo aýylynyń týmasy Álıhan Mýradov bolyp shyqty.

"Jambyl oblysyna shyqtyq, onda bizdiń bólimshelerimiz kúdiktiniń týystaryn tez taýyp aldy, olar arqyly oǵan áser etýge tyrystyq, sol arqyly kúdikti jasaýy yqtımal áreketterdi barynsha azaıtty. Beıbit jolmen sheshýge tyrystyq, sońǵy shara retinde kelissóz kúshi bolmasa, arnaıy bólimsheler qosylýy kerek edi", - dedi ishki ister mınıstriniń birinshi orynbasary.