Senat depýtattary "Zańsyz ıemdenilgen aktıvterdi memleketke qaıtarý týraly" zańdy maquldady. Zań prezıdentke jiberildi.
Zańǵa sáıkes, zańsyz baıyǵan jeke jáne zańdy tulǵalardyń reestri jasalady. Tizim jabyq bolady. Burynǵy sheneýnikter men memlekettik uıymdardyń eks-basshylary da, olarmen baılanysta bolǵan barlyq adam kúdiktiler qataryna kirýi múmkin. Mysaly, jaqyn týystary, tanystary, kólik júrgizýshisi, tipti úı qyzmetshisi de kúdikke ilinýi yqtımal.
"Zańsyz ıemdenilgen aktıvterdi qaıtarý boıynsha arnaıy memlekettik qor jáne basqarýshy kompanıa da qurylady. Elge qaıtarylǵan qarajat qordyń shotyna túsedi. Al basqarýshy kompanıanyń mindeti – zańsyz alynǵan múlikti satyp, aqshasyn arnaıy qorǵa aýdarý. Basqarýshy kompanıanyń jalǵyz quryltaıshysy úkimet bolady. Qaıtarylǵan aqsha Qazaqstan halqynyń ál-aýqatyn arttyrýǵa baǵyttalǵan áleýmettik jáne ekonomıkalyq jobalardy qarjylandyrýǵa jumsalady", dep aıtylady.
Alaıda halyqqa bólingen qarajatty jymqyrǵan shendilerdiń baılyǵyn qaıtara alady degenge kúmánmen qaraıtyndardyń sany kóp. Atalǵan zań jobasy ekinshi oqylymda qabyldanǵan. Endi prezıdent qol qoıǵan soń zań kúshine enetin bolady.
Pikir qaldyrý