Bıyl 1 shildeden bastap zeınetaqy júıesindegi birqatar jańalyqtardy kózdeıtin áleýmettik kodeks kúshine enedi. Almaty qalasynyń óńirlik komýnıkasıalar qyzmetiniń brıfıńine qatysqan Biryńǵaı jınaqtaýshy zeınetaqy qorynyń ókilderi olardyń eń mańyzdylaryna toqtaldy. 

«2023 jyldyń 1 shildesinen bastap mindetti zeınetaqy jarnalary (MZJ) jáne mindetti kásiptik zeınetaqy jarnalary (MKZJ) esebinen qalyptastyrylǵan zeınetaqy jınaqtaryn ınvestısıalyq portfeldi basqarýshynyń (IPB) senimgerlik basqarýyna berý kezinde zeınetaqy jınaqtarynyń eń tómengi jetkiliktilik shegi budan bylaı eskerilmeıdi. Salymshy joǵaryda atalǵan jınaqtarynyń 50% deıin IPB-nyń senimgerlik basqarýyna berýge quqyly», - dedi «BJZQ»  AQ basqarma tóraǵasy Japnat Qurmanov.

Qazir naryqta osyndaı bes kompanıa jumys isteıdi: 
• "First Heartland Jusan Invest" AQ
• "BCC Invest" AQ - "Bank SentrKredıt"AQ enshiles uıymy
• "Halyk Global Markets" AQ ("Qazaqstan Halyq Banki" AQ EU)
• "Sentras Sekúrıtız" AQ
• "Halyk Finance" Qazaqstan Halyq Banki EU" AQ.

«Zeınetaqy jınaqtarynyń saqtalýyna memlekettik kepildik Ulttyq Banktiń (QRUB) basqarýyndaǵy jınaqtar boıynsha ǵana beriledi. Salymshy jınaqtardy bir nemese birneshe IPB-ǵa aýdarǵan kezde jınaqtardyń saqtalýy men tabystylyǵyn osy kompanıalar qamtamasyz etedi. Sondyqtan, óz jınaqtaryńyzdy IPB basqarýyna aýdarmaı turyp, BJZQ saıtynan naryqtaǵy basqarýshy kompanıalardyń qoldanystaǵy tizbesin qarap, olardyń ınvestısıalyq deklarasıalaryn, ınvestısıalyq qyzmetterine sholýlardy, ınvestısıalaý tájirıbesi men nátıjelerin zerdelep, táýekelderdi baǵalaýǵa keńes beremiz», - dedi spıker.  

Sonymen birge, zeınetaqy jınaqtaryn IPB senimgerlik basqarýynan Ulttyq banktiń senimgerlik basqarýyna qaıtarý múmkindigi beriletin merzim 2 jyldan 1 jylǵa deıin qysqarady.

«Buǵan deıin jasalǵan zeınetaqy anýıteti sharty bolǵan jaǵdaıda, IPB senimgerlik basqarýyna berýge qoljetimdi zeınetaqy jınaqtarynyń mólsheri ózgerissiz qalady – salymshynyń JZSH-daǵy zeınetaqy jınaqtary somasynyń 100%», - dedi spıker.

Zeınetaqy jınaqtaryn bir nemese birneshe IPB-ǵa aýdarý, sondaı-aq, jınaqtardy Ulttyq banktiń basqarýyna qaıtarý úshin salymshy BJZQ-ǵa ótinishpen júginýi qajet. Ony BJZQ saıtyndaǵy Jeke kabınet arqyly ne BJZQ-nyń kez kelgen bólimshesine ózi júgingen kezde berýge bolady.