Qazaqstanda mamyr-maýsym aılarynda alaıaqtarǵa aldanyp qalǵan zeınetkerlerdiń sany kúrt ósti. Shyǵynnyń kólemi 130 mıllıon teńgeden asqan, dep habarlaıdy Polisia.kz.
Alaıaqtar sońǵy kezde keńinen taraǵan aıla-amalmen zeınetkerlerdi aldaıdy. Telefon shalyp, jaqyn týystary jol-kólik oqıǵasyn jasaǵanyn aıtady. Al olardy jaýapkershilikten qutqarý úshin aqsha talap etedi.
Búginde alty qalada 30-dan astam adam ustalyp, altaýy qamaýǵa alyndy. Basym bóligi – aqsha alyp ketýge kelgen "kýrerler". Olardyń ishinde "Iandeks taksı" júrgizýshileri, tamaq jetkizýshiler, joǵary oqý oryndarynyń stýdentteri men kámelet jasyna tolmaǵandar bar.
Máselen, 22 maýsym kúni Qaraǵandy qalalyq polısıa basqarmasyna qarasty Ońtústik-SHyǵys polısıa bólimine 79 jastaǵy zeınetkerden aryz tústi. Oǵan belgisiz bireý habarlasyp, ózin polısıa qyzmetkerimin dep tanystyrǵan. Sosyn qyzy qaıǵyly jaǵdaımen aıaqtalǵan jol-kólik oqıǵasyna kináli bolǵanyn aıtqan. Al qylmystyq jaýapkershilikten qutylý úshin 15 myń AQSH dollaryn berýdi talap etken. Zeınetker ondaı aqshasynyń joq, alaıda qolynda 9400 AQSH dollarynyń bar ekenin aıtqan. Sol kezde "jalǵan" polıseı dalaǵa shyǵyp, aqshany kýrerge berýdi buıyrǵan. Zeınetker dalaǵa shyǵyp, qolyndaǵy 9400 AQSH dollaryn belgisiz bir kýrerge bergen. Artynan qyzyna habarlasqanda, eshqandaı jol-kólik oqıǵasy bolmaǵanyn bilgen.
Polıseler aqshany alyp ketken 20 jastaǵy jigitti ustady. Ol óz kinásin moıyndady. Jaýap berý kezinde jumys usynǵan adammen áleýmettik jeli arqyly tanysqanyn jetkizdi. Mindeti – zeınetkerdiń mekenjaıyna baryp, aqshany alyp ketý. Tapsyrmany oryndaǵany úshin 400 AQSH dollaryn alyp qalǵan. Al qalǵan aqshany jeli arqyly "jumys berýshige" jibergen. Sondaı-aq kúdiktiniń osyǵan uqsas taǵy da eki qylmysqa qatysy bary anyqtaldy. Birinshi jaǵdaıda shyǵyn kólemi 8,4 mln teńge bolsa, ekinshi jaǵdaıda 4 mıllıon teńgeni quraǵan. Jábirlenýshilerdiń barlyǵy – zeınetkerler.
