Májilistiń Agrarlyq máseleler komıtetiniń tóraǵasy Serik Egizbaevtyń jetekshiligimen Nura toptyq sý qubyryn jóndeý máselesine arnalǵan jıyn ótti. Oǵan quzyrly memlekettik organdardyń ókilderi qatysty.

Májilis Tóraǵasy Erlan Qoshanovtyń 1 maýsymdaǵy Aqmola oblysyna jumys sapary barysynda dıqandar osy máseleni kótergen edi. Sýsyz otyrǵan óńir halqy Palata spıkerine shaǵymdaryn jetkizdi. Osyǵan baılanysty Erlan Qoshanov Májilistegi Agrarlyq máseleler komıtetine jaǵdaıdy jeke baqylaýǵa alýdy tapsyrǵan bolatyn.

Nura magıstraldyq sý qubyry 1979 jyly paıdalanýǵa berilgen. Ol Aqmola oblysynyń Egindikól, Atbasar, Qorǵaljyn, Astrahan jáne Selınograd aýdandaryn qamtıdy. Qubyrdyń paıdalanylatyn bóligi – 336 shaqyrym. Búginde onyń Egindikól, Atbasar, Qorǵaljyn aýdandaryna sý jetkizetin 34 shaqyrymy tez arada jóndeýdi qajet etip otyr.

«Ekologıa mınıstrligi, Qarjy mınıstrligi, «Qazsýshar» mekemesi men ákimshilik ókilderimen birge máseleni sheshý joldaryn izdedik. Ekologıa mınıstrliginiń baıandamasyn tyńdasaq, jyldyń sońyna deıin tek qujattardy rásimdeýdi aıaqtaıdy eken. Kúnniń ystyǵynda basqany aıtpaǵanda, aýrýhanalar da sýsyz qalyp otyr. Sondyqtan dıqandar dabyl qaǵyp, janaıqaılaryn jetkizdi», – dedi komıtet tóraǵasy Serik Egizbaev.

Qubyr jumysynyń toqtaýyna baılanysty óńirde otyzǵa jýyq eldi meken sýsyz qalǵan. Oblystyq máslıhat depýtaty Ábilqaıyr Oshaqbaev máseleniń birneshe jyldan beri sheshimin tappaı kele jatqanyn aıtyp, búginde Egindikól, Atbasar, Qorǵaljyn aýdandarynyń halqy kóldiń sýyn paıdalanyp otyrǵanyn basa aıtty.

«Ekologıa mınıstrligi ákimshilik zań júzinde tótenshe jaǵdaı jarıalasa, jumysty jedeldetýge múmkindik týatynyn aıtyp otyr. Tótenshe jaǵdaı jarıalandy. Endi soǵan qaraı mınıstrlik 20 maýsymǵa deıin sý qubyrynyń barlyq qujatyn aıaqtap, Indýstrıa jáne ınfraqurylymdyq damý mınıstrligine saraptamaǵa beredi. Normatıv boıynsha 45 jumys kúni ishinde saraptaý kerek. Biraq biz kem degende bir jumanyń ishinde aıaqtaýdy talap etip jatyrmyz. Odan soń Qarjy mınıstrligi qarjy bóledi. Bárimiz birigip, osy máseleni joq degende bir aı ishinde sheship, tamyz aıynda naqty qurylys jumystaryn bastap ketýge bar kúshimizdi salamyz», – dedi Serik Egizbaev.

Óz kezeginde Ekologıa jáne tabıǵı resýrstar birinshi vıse-mınıstri Nurken Shárbıev magıstraldyń sý shyǵynyn azaıtýǵa kómektesetin 320 shaqyrymyn jóndeýge arnalǵan jobalyq-smetalyq qujattamalardyń jasaqtalyp jatqananyn aıtyp, depýtattardan kásiporynnyń qarjylyq-ekonomıkalyq jaǵdaıyn jaqsartý úshin 600 mln. teńge kóleminde qarajat bólý múmkindigin qarastyrýdy surady.

Komıtet tóraǵasynyń pikirinshe, qurylys jumystary shamamen jyl sońyna deıin jalǵasady. Másele sheshimin tapqansha óńirdegi tótenshe jaǵdaı rejımi saqtalady.

Elimizde sý máselesin sheshýge Memleket basshsysy erekshe mán berip otyr. Sondyqtan bul jaǵdaı depýtattardyń turaqty baqylaýynda bolady.