Qnet qarjy pıramıdasyn Qyzylorda oblysy aýmaǵynda quryp, oǵan basshylyq jasady degen kúdikke ilingen azamatqa qatysty sotqa deıingi tergeý júrgizilip jatyr, dep habarlaıdy Ulysmedia.kz.

Qarjylyq monıtorıń agenttiginiń málimetinshe, ol 2020-2021 jyldar aralyǵynda qarjy pıramıdasyn quryp, onyń qyzmetine 38 tulǵany qatystyrǵan (zardap shekkender), keltirilgen zalal kólemi – 46 mln teńge.

Sottyń sanksıasyna sáıkes, ol «kúzetpen ustaý» túrindegi sharamen 2 aı merzimge qamaýǵa alynyp, ýaqytsha ustaý ızolátoryna qamaldy.

“Sotqa deıingi tergeý jalǵasýda. QR QPK-niń 201 babynyń talaptaryna sáıkes ózge málimetter jarıa etilmeıdi. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR Qylmystyq-prosestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi”, – delingen habarlamada.

Aıta keteıik, budan buryn Qostanaıda Qnet LTD qarjy pıramıdasynyń uıymdastyrýshysy jazadan qutylyp ketken bolatyn.