1 shildede 2022 jylǵy 1 qyrkúıekke deıin ákelingen sheteldik avtokólikterdi zańdastyrýǵa ótinim qabyldaý toqtatyldy.
"QR İİM basqa memlekettik organdarmen ózara is-qımyl jasap, 23 qańtardan bastap elge 2022 jylǵy 1 qyrkúıekke deıin ákelingen sheteldik avtokólikterdi zańdastyrýdy júrgizdi. 1 shildede zańdastyrýǵa ótinim qabyldaý toqtatyldy. Osy aralyqta 196 myń avtokólik zańdastyryldy", - dedi İshki ister mınıstrligi baspasóz qyzmetiniń ókili Shuǵyla Turlybek aptalyq brıfıńide.
Sondaı-aq qazaqstandyq esepke 12 myńnan astam konstrýktor-avtokólik qoıyldy.
"1 shildege deıin ótinim bergen barlyq azamattarǵa avtokólikteri zańdastyrýǵa qoıylatyn talaptarǵa sáıkes kelgen jaǵdaıda, zańdastyrý quqyǵy beriledi.
EAEO elderinde burynǵy tirkelgen jeri boıynsha esepten shyǵarylmaǵan jáne osy sebepti zańdastyrylmaǵan avtokólikterge kelsek, olardyń ıeleri kólikti keri áketedi. Al eger basqa eldegi burynǵy tirkeý ornynan esepten shyǵarylsa, Qazaqstanda keıinnen bastapqy tirkeý týraly mindetteme jáne 5 jylǵa Qazaqstanda ýaqytsha esepke qoıý quqyǵy berilmek", - dep túsindirdi resmı ókil.
Ýaqytsha esepke qoıý kezinde kólik quralyn tirkeý týraly kýálik jáne QR memlekettik nómirlik belgileri beriledi.
Tirkeý týraly kýálikte «ýaqytsha esepke alý, ıelikten shyǵarý jáne Qazaqstan Respýblıkasynan tys jerlerge shyǵý quqyǵynsyz» degen jazbalar kórsetiledi.
Shet memlekettiń tirkeý qujattary men memlekettik nómirlik belgileri "Azamattarǵa arnalǵan úkimet" memlekettik korporasıasynda saqtaýǵa tapsyrylady.
"Eger Qazaqstan azamattary atalǵan avtokólikterdi elden tys jerlerge áketýdi sheshse, olar QR tirkeý qujattary men memlekettik nómirlerin tapsyrýy kerek, sodan keıin olarǵa shet memlekettiń tirkeý qujattary men memlekettik nómirleri qaıtarylady. Al avtokólik burynǵy tirkelgen elinde esepten shyǵarylsa jáne Qazaqstan azamattary olardy Qazaqstanda bastapqy tirkeýdi uıǵarsa, ýtıl alymynsyz, bastapqy tirkeý úshin 200 000 teńge tóleıdi", - dedi Shuǵyla Turlybek.
Pikir qaldyrý