Shymkentte jasóspirim zeınetkerlerdi 7 mln teńgege aldap ketken. Qazir tergeý amaldary júrgizilip jatyr. 

Polısıa qyzmetkerleriniń málimetinshe, egde jastaǵy turǵyn alaıaqtyq týraly aryzben habarlasqan. Áıeldiń aıtýynsha, oǵan belgisiz bireý qońyraý shalyp, ózin polısıa qyzmetkeri retinde tanystyryp, qyzy jol-kólik oqıǵasyn jasaǵanyn habarlaǵan. Kúdikti eger zeınetker belgili bir somany jaqyn arada onyń mekenjaıyna baratyn adamnan berip jiberse, kináli adam jazadan qutyla alady dep sendirgen. Qońyraý shalýshy telefondy óz sybaılasyna tapsyryp, ol dirildegen daýyspen anasynan kómek suraǵandaı keıip tanytqanda, áıel senip qalǵan. Artynsha qala turǵyny alaıaqtarǵa óziniń barlyq jınaǵan 4,5 mln teńge kólemindegi aqshasyn bergen.

Sol kúni polısıaǵa telefon alaıaqtarynyń taǵy bir qurbany osyndaı shaǵym túsirdi. Nemeresine kómektesý úshin 79 jastaǵy zeınetker 2,5 mln teńge bergen.

İzdeý sharalary barysynda jedel ýákilder beınebaqylaý kameralarynyń kómegimen jábirlenýshilerdiń úıine qolma-qol aqsha alý úshin kelgen jigitti anyqtap, ustady. Ol Túrkistan oblysynyń 16 jastaǵy turǵyny bolyp shyqty. Óz jaýabynda jas jigittiń mobıldi messendjer arqyly alǵan nusqaýlaryna sáıkes áreket etkendigin aıtty. Onyń mindeti – aıtylǵan mekenjaılardan aqsha alý jáne ony belgili bir banktik shottarǵa aýdarý. Bul úshin ol 50 myńnan 100 myń teńgege deıin aqy alyp otyrǵan.