El ishindegi dinı túıtkilderdiń bel ortasynda júrgen 75 maman búgin Nur-Múbarak ýnıversıtetinde bir aılyq kýrsty támamdady. Qazaqstan Respýblıkasy Aqparat jáne qoǵamdyq damý mınıstrliginiń Din isteri komıtetimen bıyl 4-shi jyl qatarynan ótkizgen «Islamdyq baǵyttaǵy destrýktıvti jáne radıkaldy dinı ıdeologıany ustanýshylardy radıkaldy kózqarastan aryltý jáne ońaltý salasyndaǵy mamandardyń biliktiligin arttyrý» kýrsynda eldegi dinı salaǵa qatysty teolog, ıslamtanýshy, dintanýshy, ımamdar bilimin jetildirdi. Aı boıy 140 akademıalyq saǵatqa negizdelgen 15 pánnen óz salasynda bilikti ári jetekshi mamandar, ıaǵnı Nur-Múbarak EIMÝ, Gýmılev atyndaǵy EUÝ, QMDB, QR UQK Akademıasynyń tájirıbeli mamandary dáris beredi.

Kýrstyń jabylý saltanatynda prorektor PhD doktor Qaırat Qurmanabev: Memleket – barshamyzdyń ortaq úıimiz. El men jer tutastyǵy, din turaqtylyǵy, beıbit qoǵam qalyptastyrýda, tipti ol teolog bolmasa da Qazaqstannyń ár azamatynyń mindeti. Bolashaq úshin jáne qaýipsiz qoǵamda ómir súrýge múddelimiz. Qazirgi jahandyq kezeńde syn-qaterler az emes, ýaqyt ótken saıyn jańadan boı kóterip otyrýy zańdy. Sondyqtan bizge mindet júktelgendikten, dinı turaqtylyqqa tikeleı jaýaptymyz. Osy maqsatta 4 jyldan beri kýrs uıymdastyryp kele jatqan QR AQDM Din ister komıtetine, osy jobada qyzmet etip jatqan árbir mamanǵa alǵysymyzdy bildiremiz,-dedi. Sondaı-aq qazirgi kezeń únemi izdenis pen jetildirýdi talap etetinin aıta kele qatysýshylarǵa aldaǵy ýaqytta da túrli bilim jetildirý, biliktilikti arttyrý kýrstarynan qol úzbeýge keńes berdi.

Al joba jetekshisi ped.ǵ.k., q.profesor Sulý Isabaeva bıylǵy kýrstyń ereksheligi baryna toqtaldy. Aldyńǵy 3 jyl ýaqyttaǵy dáris alýshylardyń syn-pikirleri eskerilip, dárister jańartylyp otyrǵanyn atap ótti. Elimizdiń túkpir-túkpirinen kelgen mamandar kýrstyń sońǵy saltanatynda óz tájirıbelerindegi kórinisterden vıdeorolık jasap ári arnaıy qoıylym usyndy. Kúmbirlegen dombyramen kúı shertip, kópshilikke merekelik kóńil-kúı syılady. Saltanat sońynda prorektor Q.Qurmanabev sertıfıkat tabystap, estelik sýretterge tústi. Kýrs qatysýshylary da óz rızalyqtaryn jaýdyryp, gúl shoqtaryn usynyp, batalaryn berdi.

Nur-Múbarak ýnıversıtetiniń baspasóz qyzmeti