Túrkistan oblysynda taý basynan qulaǵan týrıs izdestirilip jatyr, dep habarlaıdy tótenshe jaǵdaılar mınıstrligi.
Saıram-Ógem ulttyq tabıǵı parkiniń aýmaǵynda 3 shilde kúni úsh adamnan turatyn top teńiz deńgeıinen 4 236 metr bıiktikte ornalasqan Saıram shyńyna shyqqan. Taýdyń basynan túsip kele jatqanda arqan úzilip, 1967 jylǵy er adam muz boıymen domalap, eńiske qulaıdy.
5 shildede aýa raıynyń qolaısyzdyǵyna baılanysty izdestirý jumystaryn jaıaý júrý arqyly da, avıatehnıkany tartýmen de júrgizýge múmkindik bolmady.
Habarlama túsken sátten bastap Qasqasý kempınginde Túrkistan oblysy polısıa departamenti, jergilikti atqarýshy organdar men TJD, Shymkent qalasy Álpınızm jáne sporttyq týrızm federasıasy qyzmetkerlerinen shtab uıymdastyrý boıynsha sharalar qabyldandy.
6 shildede saǵat 6.30-dan bastap jedel-qutqarý jasaǵynyń 8 qutqarýshysy jáne álpınızm federasıasynan tórt álpınıs izdeý jumystaryna jiberildi.
Qurylǵan shtabtan oqıǵa ornyna deıingi jalpy araqashyqtyq – 15 km. Taý shatqaldarynyń tik ornalasýyna jáne tabıǵı kedergilerdiń kóp bolýyna baılanysty qutqarý-izdestirý jumystary sozylýy múmkin.
İzdestirý jumystaryna qosymsha Saıram-Ógem ulttyq parkiniń ormanshylarynan at patrúlderi tartylady. Qutqarýshylar álpınıstik qural-saımandarmen, spýtnıktik telefondarmen, radıobaılanys quraldarymen jáne 3 táýlikke jetetin azyq-túlikpen qamtamasyz etildi.
