Belarýs prezıdenti Aleksandr Lýkashenko "Vagner" jaldamaly áskerı kompanıanyń basshysy Evgenıı Prıgojınniń Reseıde júrgenin habarlady. Sondaı-aq, Lýkashenko "Vagner" PMK jaýyngerleri óz lagerlerinde ekenin atap ótti.

"Bul – reseılik kompanıa. Sol sebepti suraqtyń maǵan qatysy joq. Meniń bilýimshe, jaýyngerler óz lagerlerinde. Al Prıgojın bolsa Sankt-Peterbýrg qalasynda. Belarýste emes. Bizdiń elde "Vagner" áskerleriniń belgili bir bóligi ornalasýy múmkin, bul meni múldem alańdatpaıdy. Olardyń maıdanda jınaǵan tájirıbelerin qarastyramyz ári daıyndyǵymyzǵa paıdalanamyz", dedi Lýkashenko. 

Eske salsaq, keshe "Fontanka" derekkózderi Prıgojınniń Sankt-Peterbýrg jáne Lenıngrad oblysyndaǵy FSB basqarmasyna barǵanyn, oǵan qarýlar men 10 mlrd rýblin qaıtaryp bergenin jazǵan bolatyn.