Qaraǵandylyq polıseıler sıntetıkalyq esirtki daıarlaıtyn zerthanany anyqtady, dep habarlaıdy Polisia.kz.
4 shilde kúni Qaraǵandy qalalyq polısıa basqarmasynyń esirtki qylmystaryna qarsy is-qımyl bóliminiń qyzmetkerleri "Qarasora" jedel aldyn alý is-sharasy barysynda qaladaǵy saıajaılardyń birinen 28 jastaǵy azamatty ustady. Ustalǵan azamat qala aýdandarynyń ár jerine 20-30 oramnan sıntetıkalyq esirtki jasyryp ketkenin moıyndady.
Ustalǵan azamattyń sıntetıkalyq esirtki jasyrǵan jerlerine júrgizilgen tintý jumystary barysynda polısıa qyzmetkerleri 3 oram, jalpy salmaǵy 100 gram bolatyn sıntetıkalyq esirtkige uqsas zattar tárkiledi.
Kúdikti jalǵa alǵan páterdi tintý barysynda sıntetıkalyq esirtki óndiretin zerthana tabylǵan.
"Polısıa qyzmetkerleri oqıǵa ornynan sıntetıkalyq esirtki zatyn pisirýge arnalǵan ındýksıalyq taqta, eki termometr, eki respırator, plasıkalyq ydystar jáne sıntetıkalyq esirtkini ólsheýge arnalǵan zattar, sondaı-aq satýǵa daıyn 500 gram sıntetıkalyq esirtki tárkiledi", – dedi Qaraǵandy oblystyq polısıa departamenti bastyǵynyń orynbasary Ábil Ábildın.
Saraptama qorytyndysyna sáıkes, tárkilengen zattar sıntetıkalyq esirtki zaty ekeni belgili boldy. Kúdikti ýaqytsha ustaý ızolátoryna qamaldy. Atalǵan derek boıynsha Qazaqstan Respýblıkasy Qylmystyq kodeksiniń 297-baby 3-tarmaǵyna sáıkes qylmystyq is qozǵaldy. Tergeý amaldary júrgizilip jatyr.
Pikir qaldyrý