Komýnaldyq sala qyzmetkerleriniń jalaqysy 135 myń teńgeden 200-300 myń teńgege deıin ósedi. Bul týraly ulttyq ekonomıka mınıstri Álibek Qýantyrov málimdedi.
Onyń aıtýynsha, komýnaldyq kásiporyndar qyzmetiniń tıimdiligin arttyrý úshin "Tabıǵı monopolıalar týraly" zańnyń 22-babyna ózgerister engizilgen. Sonyń biri – komýnaldyq sala qyzmetkerleriniń, ıaǵnı santehnık, elektrık, dánekeýshilerdiń jalaqysyn 50%-ten 100%-ke deıin kóterý.
"Osylaısha, ortasha jalaqy sala men óńirge baılanysty 135 myń teńgeden 200-300 myń teńgege deıin ósedi. Bul turǵyn úı-kommýnaldyq sharýashylyq salasyndaǵy 200 myńǵa jýyq jumysshyǵa áser etedi", - dedi Qýantyrov úkimet otyrysynda.
Ekinshisi – ıesiz jelilerdi kezeń-kezeńimen berý. Osylaısha, 25 myń shaqyrymnan astam komýnaldyq jeli senimgerlik basqarýǵa jáne komýnaldyq menshikke beriledi. Mınıstr qabyldanǵan túzetýler komýnaldyq kásiporyndardyń ıesiz jelilerdi ustaýǵa jáne paıdalanýǵa jumsaǵan shyǵyndaryn óteýge múmkindik beretinin atap ótti.
Pikir qaldyrý