Kelesi aptada shetelde esepten shyǵarylmaǵan kólikterdi ýaqytsha tirkeý sharalary bastalady. Bul týraly ákimshilik polısıa komıtetiniń tóraǵasy Qaısar Sultanbaev málimdedi.
Sheteldik kólikterdi zańdastyrý barysynda kóptegen júrgizýshiler óz kóligin ózge eldiń esebinen shyǵara almady. Ondaı avtokólikterdi zańdastyrýdy keıinge qaldyrýǵa sheshim qabyldandy. Biraq olardy ýaqytsha tirkeýge qoıý qajet.
"Ýaqytsha esepke qoıý kezinde Qazaqstan Respýblıkasynyń kólik quralyn tirkeý týraly kýáligi jáne memlekettik nómirlik belgileri beriletin bolady Tirkeý týraly kýálikte "ýaqytsha esepke alý, ıelikten shyǵarý jáne Qazaqstan Respýblıkasynan tys jerlerge shyǵý quqyǵynsyz" degen jazbalary kórsetiledi", - dedi Sultanbaev ortalyq komýnıkasıalar qyzmetinde ótken brıfıńte.
Al sheteldik tirkeý qujattary men memlekettik belgileri memlekettik korporasıaǵa saqtaýǵa tapsyrylatyn bolady.
Onyń aıtýynsha, ýaqytsha tirkeýge qoıylǵan avtokólikterdi elden tys jerlerge áketýge sheshim qabyldansa, Qazaqstannyń tirkeý qujattary men memlekettik nómirlerin tapsyrý kerek. Sodan keıin olarǵa shet memlekettiń tirkeý qujattary men memlekettik nómirleri qaıtarylady.
"Al eger osy avtkólikterdi Qazaqstan azamattary Qazaqstanda bastapqy tirkeýdi júzege asyrý týraly sheshim qabyldasa, aldymen, burynǵy tirkelgen elinde esepten shyǵarady. Sosyn 200 000 teńge mólsherinde bastapqy tirkeý úshin alym tóleıdi. Iaǵnı, olarǵa zańdastyrý sharttary qoldanylatyn bolady jáne ýtılızasıalyq alym tólenbeıdi", - dep atap kórsetti Sultanbaev.
Ýaqytsha tirkeý sharalary 17 shildede bastalady. Qazirgi kezde ondaı kólikterdi ýaqytsha esepke qoıý úshin tıisti servıs ázirlenip jatyr.
Pikir qaldyrý