Qańtarda oqqa ushqan 4 jasar Aıkórkem Meldehannyń isi boıynsha sot bastaldy. Tyńdalym Almaty garnızony áskerı sotynda ótti.

Aıkórkemniń ólimine áskerı qyzmetker Arman Juman aıyptalyp jatyr. Oǵan "bıligin asyra paıdalandy" degen aıyp taǵylǵan. 

Sotqa Aıkórkemniń ákesi men BAQ ókilderi qatystyrylmaǵan. Áskerı qyzmetker retinde Aıkórkemniń aǵasy ǵana tyńdalymǵa qatysýǵa ruqsat alǵan.

Sot qyzmetkeri Rústem Muhtarovtyń aıtýynsha, is materıaldary memlekettik qupıa bolǵandyqtan sot jabyq ótedi. 

Kelesi sot otyrysy 26 shildede ótedi. Resmı túrde jábirlenýshi dep tanylǵan Aıkórkemniń ákesi Aıdos Meldehanuly men ápkesi Janel Meldehan sotqa qatyspaıdy.

"Týǵan ákesin sotqa qatystyrmaý — baryp turǵan soraqylyq. Bul bıliktiń tapsyrmasy ekenin aıtpasa da túsinikti. Qyzymdy bılik atyp tastady. Endi qylmystaryn jasyrý úshin sotty ádeıi jabyq ótkizip jatyr" - dedi Aıkórkemniń ákesi Aıdos Meldehan.

Advokat Janǵazy Kúnserkın sotty ashyq ótkizýdi talap etip, sotqa shaǵym túsirdi. Alaıda sýdıa sottyń "qupıa" statýsyn ózgertpeı, jabyq jaǵdaıda ótkizýge qaýly shyǵardy.