"Qurmetti Qasym-Jomart Kemeluly! Qasiretti qańtar oqıǵasyna jyl toldy. Osy ýaqyt ishinde qandy oqıǵaǵa qatysty tergeý amaldary júrgizilip, túrli komısıalar, jumys toptary men azamattyq qoǵam ókilderi zertteýler júrgizdi. Biraq áli kúnge deıin oqıǵanyń mán-jaıy ashyq aıtylyp, onyń ádil baǵasy berilgen joq. Qandy oqıǵaǵa qatysty túrli deńgeıdegi sot oryndarynda ótken prosesterde óreskel zańsyzdyq oryn alýda. Siz: "Jańa Qazaqstan: jańarý men jańǵyrý joly" atty Qazaqstan halqyna joldaýyńyzda: "Qoǵamda zań ústemdigi berik ornyǵyp, sot tóreligi ádil atqarylýy qajet", – degen edińiz. Alaıda biz, qazaq qalamgerleri men zıaly qaýym ókilderi, 2023 jyldyń shilde aıynyń 11 kúni Qańtar oqıǵasy kezinde "áýejaıdy basyp alý isi" boıynsha sottalǵan jýrnalıs Áıgerim Tileýjanǵa, belsendi Qalas Nurpeıisovke, Nurlan Dálibaevqa, Ermuhamet Shılibaevqa jáne Janaıdar Kármenovke shyǵarylǵan úkimge qatysty qatal jáne túbegeıli kelispeýshiligimizdi bildiremiz. "Áýejaı isiniń" úkimi halyq qarsylyǵyn kúsheıtip, qoǵamda rezonans týǵyzdy. Bul jaǵdaıdy egjeı-tegjeıli zerttep, osy iske erekshe nazar aýdarýyńyzdy suraımyz. Jáne de Ata Zańymyzda belgilengen "halyq pen memlekettik bılik birliginiń, Konstıtýsıanyń myzǵymastyǵynyń, adam jáne azamattyń quqyqtary men bostandyqtarynyń nyshany jáne kepili" retinde Sizden joǵaryda atalǵan azamattarǵa arasha túsýińizdi suraımyz. Qurmetti Qasym-Jomart Kemeluly! Jańa Qazaqstannan úmitti Qazaqstan Respýblıkasynyń barlyq Halqy jańa ózgeristerdi kútken edi. Alaıda, qoǵamda ábden qalyptasyp qalǵan ESKİ JÚIENİŃ salqynyn áli de sezinýdemiz. Ádiletti Qazaqstannyń berik ornyǵýy úshin Qasiretti qańtar oqıǵasy boıynsha júrgizilip jatqan sot prosesteri ádil ótýi tıis dep sanaımyz. Sondaı-aq, Ádiletti Qazaqstan qurý ıdeıasyna qarsy áreket etip otyrǵan sot oryndaryndaǵy tulǵalardy ádil anyqtap, olarǵa qoldanystaǵy zań aıasynda qatań jaza qoldanylýyn suraımyz. Qurmetpen, qazaq qalamgerleri men zıaly qaýym ókilderi" - dep jazylǵan hat mátininde.