Qasym-Jomart Toqaevqa Túrkistan oblysynyń Saryaǵash aýdanynda 5 jasar qyz balanyń óltirilgeni jónindegi qaıǵyly oqıǵa týraly málimet berildi, dep jazady Aqorda. 

Quqyq qorǵaý organdary isti tergeý amaldaryn júrgizip jatyr. Kúdikti anyqtaldy.

"Qolda bar aqparat boıynsha, kúdikti buǵan deıin kisi óltirgeni úshin sottalyp, 10 jylǵa bas bostandyǵynan aıyrylǵan. Bıyl oǵan adam densaýlyǵyna qasaqana aýyr zıan keltirgeni úshin 3 jylǵa bas bostandyǵyn shekteý jóninde úkim shyǵarylǵan.

Prezıdent Bas prokýratýra men İshki ister mınıstrligine bolǵan qaıǵyly oqıǵanyń mán-jaıyn muqıat tekserýdi tapsyrdy. Memleket basshysy bıyl shyǵarylǵan sot úkiminiń zańdylyǵyn qarastyrý jáne adamǵa qatysty asa qaýipti qylmys jasaǵany úshin qylmystyq jaýapkershilikti kúsheıtý mańyzdy dep sanaıdy", delingen habarlamada. 

Eske salaıyq, budan buryn Túrkistan oblysynda qaskóı 5 jasar qyzdy zorlap óltirgeni habarlanǵan.