Qonaev qalalyq soty Ermek Narymbaevtyń jazasyn jeńildetip, bostandyqqa shyǵarý týraly sheshim qabyldady.

Orda.kz portalynyń habarlaýynsha Narymbaev 15 táýlikten keıin bostandyqqa shyǵady.

13 shildede ótken tyńdalymda sot belsendini merziminen buryn bosatyp, 11 aıǵa jýyq probasıalyq baqylaýda ustaýǵa sheshim shyǵarǵan.

Eske sala keteıik, Narymbaev 2010 jyly Nursultan Nazarbaevtyń otstavkaǵa ketýin talap etken jıynda "Nazarbaev, ket!" dep urandatqan bolatyn. 2015 jyly áleýmettik jelidegi jazbasy arqyly "arazdyq týdyrdy" dep aıyptalyp, 3 jylǵa sottalǵan. Keıinnen bul shartty túrdegi jazaǵa aýystyrylǵan. Osy kezde belsendi jeke basyna qaýip tóngenin aıtyp, Ýkraınaǵa ketip qalǵan bolatyn. Alaıda 2022 jyldyń aqpanynda Qazaqstanǵa qaıtyp oralyp, áýejaıda tutqyndalyp, qamaýǵa alynǵan edi.